O alcalde de Ames, José Miñones, o concelleiro de Obras, Blas García, e mailo concelleiro do Medio rural, Manuel Lens, achegáronse ata os lugares de Fraíz e A Moniña, na parroquia de Biduído, para ver como quedaron as obras de mellora de viarios que se executaron nestas aldeas.

Os traballos executados permitiron a pavimentación dos viarios interiores de Fraíz, divididos en sete treitos, coa reposición do paquete de firme con cinco centímetros de zahorra e doce de formigón, previa demolición, nivelación e compactación do pavimento existente.

Por outra banda, a pavimentación de viarios na Moniña estivo dividida en cinco treitos, coa reposición do paquete de firme con cinco centímetros de zahorra e doce de formigón, previa demolición, nivelación e compactación do pavimento existente. Executouse tamén a pavimentación de dous sobreanchos con quince centímetros de zahorra e doce de formigón.

En ambas aldeas tamén se realizaron traballos para executar cunetas de seguridade revestida de formigón, baixo as que se canalizaron tubarías de PVC, así como arquetas con sumidoiro para canalización de augas pluviais.

A maiores do proxecto de execución destas obras e con fondos propios asfaltouse unha pista no lugar de Fraíz e que bordea o núcleo paralelo á antiga vía do tren. Esta obra realizouse por petición dos veciños e veciñas do lugar, xa que se atopaba con algunhas fochancas e ten un uso habitual como saída da parte alta de Fraíz.

O concelleiro de Obras e Servizos Básicos, Blas García, apunta que “a través dos fondos provinciais do POS+2018 puidemos mellorar os viarios interiores de dúas aldeas da parroquia de Biduído. Estes traballos están recollidos nun plan máis amplo que contempla ir mellorando os camiños interiores das aldeas do rural amesán que se irán facendo con cargo a estes fondos da Deputación da Coruña”.