En palabras da presidenta, Teresa Villaverde, “a reunión tiña dous obxectivos: o primeiro, de carácter institucional, presentarlle ao Delegado, como representante do Goberno Central en Galicia, a Asociación e o estado actual do Camiño da Ría de Muros Noia.

O segundo foi  informalo acerca de varias iniciativas que se van a poñer en marcha e que son competencia de diferentes organismos estatais como o Instituto Geográfico Nacional,  Instituto Nacional de Estadística, Correos, e outros no ámbito das das infraestruturas viarias, etc. O resultado foi moi satisfactorio xa que dende a Delegación vanse facilitar todos estes contactos,  e, polo tanto, agardamos que nos vindeiros meses as xestións comecen a dar os seus frutos”.

Outra parte da reunión tivo por obxecto o estudo de posibles vías de financiamento para diferentes proxectos vinculados  a este itinerario que quere converterse  nun referente nas rotas de peregrinación a Compostela, especialmente na súa vertente marítima.

“ Éste é un  ámbito especialmente interesante para o noso Concello, e máis concretamente, para a capital municipal, xa que Bertamiráns é o punto de partida para percorrer os 12 km a pé que complementen as 90 millas náuticas, requisitos mínimos para acadar a Compostela. Bertamiráns é, tamén, o maior núcleo de poboación da última etapa do Camiño da Ría Muros Noia,  e onde as peregrinas e peregrinos atopan practicamente calquera servizo que podan necesitar”, refire Manuel Lens, concelleiro da área  de Turismo de Ames.