Ata o luns 15 de xullo está aberta a convocatoria de axudas ás familias numerosas de Ames, cuxa contía ascende neste exercicio aos 100.000 euros, destinados ao apoio económico destas unidades familiares, á fixación de poboación e á continuidade do crecemento demográfico do concello. Neste senso, poden optar a estas subvencións as familias que teñan fixada a súa residencia habitual en Ames, con polo menos un ano de antigüidade ininterrompido, e que cumpran cos criterios de familia numerosa da Consellería de Política Social da Xunta de Galicia ou doutros organismos similares doutras comunidades autónomas.

O importe individual das subvencións concedidas ao abeiro desta convocatoria será de 1.200 euros por unidade de convivencia, agás as familias acolledoras en réxime de acollemento temporal que percibirán a contía proporcional equivalente ao tempo de duración do acollemento. No caso de que as solicitudes concedidas en aplicación dos criterios previstos nas presentes bases superen o orzamento dispoñible no orzamento municipal para a presente convocatoria, o órgano xestor procederá á redución proporcional do importe individual da axuda ata alcanzar o importe máximo previsto.

Poderán optar a estas subvencións as unidades de convivencia que teñan fixada a súa residencia habitual no Concello de Ames que cumpran tanto os requisitos xerais como os específicos desta convocatoria.

Unidade de convivencia aos efectos desta convocatoria
Entenderase por unidade de convivencia o conxunto de persoas que convivan no mesmo marco físico e se atopen vinculadas coa persoa solicitante por matrimonio ou calquera outra forma de relación estable análoga á conxugal, por nacemento, adopción ou acollemento.

Nos supostos de nulidade, separación ou divorcio dos proxenitores, a persoa beneficiaria da prestación será o pai/nai que teña a custodia dos fillos/as, de acordo co establecido no convenio regulador ou sentenza de separación, divorcio ou modificación de medidas. Os fillas/as deben formar parte da mesma unidade de convivencia que o proxenitor que teña a custodia, xustificándoo mediante o certificado de convivencia.

En caso de custodia compartida concederase unha única subvención ao proxenitor que a solicitase. No suposto de que ambos proxenitores tramitaran a solicitude por separado resolverase por orde de entrada da solicitude no Rexistro, inadmitíndose a trámite por este motivo a última solicitude. En ningún caso poderán ser beneficiarios/as os proxenitores privados da patria potestade dos seus fillos/as, ou se a curatela fora asumida por unha institución pública.

Requisitos referidos á renda e ao patrimonio
As persoas solicitantes están obrigadas a presentar declaración do IRPF do exercicio 2023. As unidades de convivencia solicitantes non deberán superar os 14.108,01€ anuais, no caso de teren 3 fillos; os 16.734,20€ no caso de teren 4; os 18.990,57€ de teren 5; os 21.168,97€ de teren 6; os 23.227,84€ de teren 7; e os 25.274,65€ de teren 8. As familias con máis de 8 fillas ou fillos non deberán superar os 1.803,73€ adicionais por membro.

No referente aos requisitos referidos ao patrimonio, este debe estar valorado en menos de 36.636,52 €, no caso de teren 3 fillos; en menos de 44.777,96€ no caso de teren 4; en menos 52.919,41€ de teren 5; en menos de 61.060,86€ de teren 6; en menos de 69.202,31€ de teren 7; e en menos de 77.343,76€ de teren 8. As unidades de convivencia con máis de 8 fillas ou fillos non deberán superar os 8.141,45€ por cada membro adicional.

Residencia habitual no concello de Ames
A unidade de convivencia deberá ter fixada a súa residencia habitual no concello de Ames cun mínimo dun ano de antigüidade ininterrompido á data de formulación da solicitude. A antigüidade esixirase a todas aquelas persoas que figuren no título de familia numerosa. No caso de que un dos proxenitores se atope traballando fóra da Comunidade Autónoma de Galicia, e non figure empadroado neste municipio, deberá acreditalo con copia do correspondente contrato de traballo e calquera outro documento que acredite a residencia efectiva (contrato de alugueiro, etc). No caso de familias monoparentais só se requirirá que figure empadroado cun ano de antigüidade o pai ou a nai que teña a custodia dos fillos/as. No caso dos menores que teñan curador/a , requirirase que figure empadroado/a no padrón municipal o curador/a do menor.

Título de familia numerosa
Deberase estar en posesión do título de familia numerosa en vigor no momento da solicitude. Os/as fillos/as que dean lugar á expedición do título de familia numero deberán ter nacido con anterioridade ou dentro do ano 2023. Todos os fillos/as incluídos no título de familia numerosa deberán formar parte da unidade de convivencia. No caso de que un mesmo menor dea lugar á expedición de dous títulos de familia numerosa, só se concederá esta axuda ao proxenitor que ostente a custodia deste menor ou menores.

Presentación de solicitudes
As solicitudes deberán presentarse ata o 15 de xullo a través da sede electrónica do Concello de Ames ou de xeito presencial nas oficinas de asistencia en materia de rexistro situadas na Casa do Concello e na oficina municipal do Milladoiro. Tamén se poden presentar as solicitudes a través de calquera outro dos medios ao que se refira o artigo 16 da Lei 39/2015 do 1 de outubro de Procedemento Administrativo Común das Administracións Públicas.

>>ACCEDE AO TRÁMITE PREMENDO NESTA LIGAZÓN.