O Concello de Ames continúa realizando melloras na rede viaria do medio rural, neste caso cunha senda para peóns ao longo de preto dun quilómetro de tramo entre os lugares de Lapido e Maguxe, na parroquia de Ortoño. A Xunta de Goberno Local do xoves 4 de novembro aprobou o expediente de licitación deste proxecto que conta cun orzamento base de licitación de 226.802,23 euros e que na actualidade está en fase de tramitación. Esta obra está incluída no Plan Ames Progresa 2021-2023.

As actuacións a realizar consistirán na creación de dous treitos de senda peonil de formigón a ambas marxes dun tramo viario de 950 metros, de 950 e 230 metros de lonxitude e dunha anchura media de 1,8 metros. O novo camiño construirase sobre 20 centímetros de saburra, previa apertura da sobreanchura necesaria para a súa aplicación.

Baixo esta capa canalizarase unha tubaxe de PVC de Ø400, cun total de 47 sumidoiros que favorecerán a drenaxe e a recollida de pluviais. Asemade, a construción da senda irá acompañada de tres treitos de muro de pedra granítica, que axudarán a limitar o derrame de terra nos puntos onde as novas vías estean máis elevadas que os terreos lindeiros. Sobre os bordes destes pasos de maior altura disporanse uns 95 metros de varandas metálicas, que terán unha altura duns 124 centímetros.

A licitación desta senda peonil súmase a outros proxectos de mellora da rede de camiños para a veciñanza postos en marcha polo Concello de Ames nos últimos meses, como a recentemente anunciada senda de 328 metros entre Biduído e As Mimosas, a vía de 530 metros entre Ventín e Coira, a de 1115 metros entre Outeiro e Costoia ou o camiño de 750 metros entre Sisalde e Agro do Muíño, xa rematado.

Neste senso pronunciouse o alcalde de Ames e concelleiro de Obras e Servizos Básicos, Blas García, que destacou a serie de esforzos que se están a realizar dende o Concello por mellorar a seguridade peonil da veciñanza do rural. “Seguimos traballando pola seguridade viaria das nosas veciñas e veciños, especialmente preto de núcleos e zonas polas que sabemos que camiñan habitualmente. Ademais, estas sendas son tamén oportunidades para mellorar as drenaxes e manter en bo estado os nosos camiños”.

Novas relacionadas

El Correo Gallego: "Lapido y Maguxe se van a unir mediante una senda peatonal"

AMSGO!: "Os lugares de Lapido e Maguxe, en Ortoño, uniranse cunha nova senda peonil"

Compostela 24 Horas: "Uniranse os lugares de Lapido e Maguxe, na parroquia de Ortoño, a través dunha senda peonil"