O Concello de Ames, a través da Concellaría de Deportes e Promoción da Saúde, organiza unha nova actividade dentro do programa Andainas Saudables. Desta vez, percorrerase a cuarta etapa do Camiño Real de Santiago a Fisterra e Muxía, unha ruta que ten un percorrido total de 120 quilómetros e que é a única que ten como orixe de partida a capital galega. Ademais, o itinerario atravesa lugares do noso concello, así como de Negreira, Santa Comba, Mazaricos, Dumbría, Cee, Corcubión, ata chegar a Fisterra e Muxía.

Deste xeito, continuase coa programación das andainas saudables percorrendo esta ruta de peregrinación. O pasado 1 de febreiro realizouse a terceira etapa que discorreu desde o lugar de Vilaserío ata Lago.

Este vindeiro mes de marzo realizarase a cuarta etapa que discorre dende o lugar de Lago ata Dumbría. Os/as participantes pasarán por diferentes lugares dos concellos de Mazaricos e Dumbría, coma A Ponte Olveira. Ao longo de todo este percorrido, poden observarse fermosas paraxes naturais como a vexetación do río Xallas ou diferentes elementos patrimoniais como hórreos, cruceiros e igrexas.  

Hai 50 prazas dispoñibles e as persoas interesadas en participar poden inscribirse á actividade no seguinte formulario ata o vindeiro mércores, 26 de febreiro, ás 14.00 horas. Tamén se pode acceder ao formulario escaneando o código QR que aparece no cartel do programa. Terán prioridade para participar as persoas empadroadas no Concello de Ames.

De novo, volverá a ofrecerse servizo de autobús que sairá desde os dous núcleos urbanos do concello. Sairá ás 9:00 horas desde a Casa da Cultura do Milladoiro e dende a praza do Concello, en Bertamiráns, ás 9:15 horas. Recoméndase levar roupa axeitada e calzado cómodo.