Ames é un concello solidario, e por iso, a Xuntanza de Empresarios de Ames e o departamento de Voluntariado colaboran nesta campaña de recollida de alimentos para que non haxa #NingunFogarSenAlimentos.

Desta maneira, a cidadanía amesá que queira participar na campaña pode achegar os seus alimentos a calquera establecemento que se encontre adherido á XEA ou achegarse á gran recollida que terá lugar o próximo sábado 13 de xuño.

A campaña basease, sobre todo, na recollida de alimentos e produtos non perecedoiros. Necesítanse con máis urxencia produtos infantís como cueiros, leite de inicio, leite de continuación... así como produtos de hixiene (champú, pasta de dentes...) e conservas. Aínda así compre recordar que se van a recoller todos os alimentos que se doen sen facer ningún tipo de excepción.

Gran recollida do sábado 13 de xuño

Xa o próximo sábado, 13 de xuño, desenvolverase unha gran recollida de alimentos e produtos na Praza da Maía. Alí, poderá achegarse todo aquel que queira participar coa súa doazón en horario de 11.00 a 13.30 horas e de 17.30 a 20.00 horas.

Posteriormente, os/as voluntarios/as do departamento de Voluntariado do concello serán os encargados de repartir todos os produtos doados entre as familias que máis o necesitan.