Entre os días 14 e 17 de abril celebrouse na vila de Torrelavega, en Cantabria, a segunda edición da Copa de España de karate por estilos, un evento de carácter internacional no que escolas e deportistas mostran os diferentes estilos de kata que se practican en España. Na competición, organizada pola Real Federación Española de Karate, o veciño do Milladoiro e conserxe do pavillón da propia vila, David Ángel Díaz Ferreiro, rematou en segunda posición na categoría de veteranos do estilo renbu-kai.

Os Concellos de Ames e Brión, xunto co Club de piragüismo Ribeiras do Tambre, organizan unha xornada de portas abertas de piragüismo, que se desenvolverá no lugar de Ponte Ínsua - Ons (Brión), o sábado 22 de xuño, entre as 10:00 e as 14:00 horas. Nesta xornada os/as participantes navegarán nun barco dragón, unha embarcación de 12,5 metros cunha tripulación de 22 padexeiros/as. Á xornada poderán asistir todas aquelas persoas maiores de 8 anos interesadas, sempre e cando saiban nadar. Para participar nesta actividade gratuíta é necesaria a inscrición previa a través do correo electrónico info@ribeirasdotambre.es . Haberá que levar traxe de baño, camiseta e chancletas.

Os deportistas Iván Rial Díaz e Tiago Larramendi Balladares, veciños de Ames, disputaron o pasado domingo 3 de abril en Marín o campionato galego de judo en categoría cadete, acadando resultados moi positivos. Rial Díaz proclamouse campión na modalidade de -90kg, mentres que Larramendi Balladares foi segundo na categoría -50kg. Ambos judocas compiten co Escola Judo Club, que leva as escolas deportivas municipais de Ames e que conta con grupos en Vedra, Boqueixón, Ames, Rois, Santiago de Compostela e Teo.

As competicións, celebradas ao aire libre a fin de semana do pasado 24 e 25 de outubro en Madrid e Granollers, contaron con tres atletas do Club Atletismo MillaRaio. Os rapaces clasificados, Daniel Cariñena López, Pablo Cariñena López e Nuno Castro Albán, conseguiron mellorar as súas propias marcas.