O salón de plenos da Casa do Concello acolleu esta mañá a presentación do slogan que acompaña ao logotipo da empresa pública empresarial Augas de Ames. Aproveitando dita presentación o presidente de Augas de Ames e alcalde do Concello de Ames, Blas García, fixo unha valoración sobre sobre o primeiro ano de funcionamento da EPEL Augas de Ames. Destacou o investimento feito de preto de 340.000 euros en obras e mellora do funcionamento da EPEL. Tamén se marcou o obxectivo de levar a auga dende a ETAP de Lens ata O Milladoiro, dotar ao rural do servizo de abastecemento, e dixitalizar e mellorar a eficiencia do ciclo urbano da auga a través do plan PERTE. Ademais, vaise abrir unha nova oficina de Augas de Ames no Milladoiro.

O Teatro Colón da Coruña acolleu este domingo, 6 de abril, a final do concurso Quero Cantar 2025, organizado pola Deputación da Coruña. Na categoría xuvenil gañaron Emma Pérez e Candela Caamaño coa canción “Preto de ti”. As dúas son amesás e alumnas da Escola Municipal de Música de Ames. Nesta mesma categoría quedaron no segundo posto Interestelares, de Cangas, coa peza “Vai calor”, mentres que a terceira posición foi para Wildfire, de Vigo, coa peza “Ladroas”. Premendo nesta ligazón podes ver a actuación de Emma & Candela. O evento estivo presentado por Soledad Felloza e contou coa actuación de Daniela Montes, gañadora o ano pasado do certame na categoría xuvenil.

Desde a asociación cultural Os Castros convídase á veciñanza amesá que estea interesada, a participar no tradicional xantar – foliada que organizan todos os anos. Nesta ocasión, será o vindeiro sábado 3 de maio no local de Trasmonte. Haberá sesión vermú con cantina e prezos populares dende as 13.00 horas. Para participar nesta xornada haberá que mercar entrada ata o 30 de abril. O prezo das entradas é de 19 euros para menores de 11 anos, e de 37 euros para os adultos. A comida será ás 14.00 horas, e pola tarde dende as 17.00 horas haberá foliada.

A Xunta de Goberno Local vén de aprobar esta semana a adxudicación das obras de mellora da seguridade viaria en Covas. Ditos traballos foron adxudicados á empresa Excavaciones Ovidio SL por un importe de 121.609,66 euros. Este proxecto, que se sufraga con cargo ao POS+ Adicional 2/2024, enmárcanse dentro do plan de arranxo dos interiores de núcleos do rural. Deste xeito, con cargo á primeira fase do POS+ Adicional (proxectos xa incluídos no POS complementario) vanse executar catro obras: a pavimentación de viarios no Castro de Ortoño; a senda dende A Ponte Maceira a Carballo, na parroquia de Trasmonte; a mellora da seguridade viaria en Covas; e a pavimentación de viarios en Biduído de Arriba.