Este xoves, 4 de xullo, a praia fluvial de Tapia acolle a inauguración dunha nova edición dos “Seráns de Ames”, un programa que durante os meses de xullo e agosto levará oito actividades a catro parroquias do concello. A primeira xornada dará comezo ás 19:00 horas, cun pregón inaugural que correrá a cargo da xornalista e escritora amesá Paula Señarís, e coa actuación do grupo, tamén amesá, As Maianas. Premendo nesta ligazón podes consultar a programación ao completo dos “Seráns de Ames”.

O jazz volve un ano máis ao Pazo da Peregrina coa celebración da sétima edición do Ames Jazz, unha iniciativa do departamento de Cultura que se desenvolverá o venres 5 e o sábado 6 de xullo. A iniciativa englobará os concertos de María Toro Trío e de Kin García Quinteto, así como a proxección do documental “A film about kids and music: Sant Andreu Jazz Band” e o faladoiro “Dende Galicia para o Mundo”. A entrada é libre e gratuíta.

O Concello de Ames, a través da Concellaría de Cultura, abre o vindeiro luns día 17 de xuño o prazo para a renovación de praza na Escola Municipal de Teatro de Ames. Dito prazo está dirixido ás persoas inscritas no curso anterior. O prazo de renovación de praza estará aberto ata o 30 de xuño. Posteriormente, do 5 ao 15 de xullo abrirá un segundo prazo para novas inscricións nos grupos que queden prazas libres. Tanto para renovar praza como para inscribirse por primeira vez haberá que cubrir o impreso normalizado e presentalo no Rexistro Electrónico Xeral do Concello de Ames ou na Sede electrónica do Concello. Tamén se poderá presentar no Rexistro presencial nas oficinas de Bertamiráns e do Milladoiro. Para dispor de máis información pódese consultar o folleto informativo da Escola municipal de teatro.

O Pazo da Peregrina acolleu este martes a presentación da VII edición do programa Ames Jazz, que se celebrará os días 5 e 6 de xullo. A iniciativa englobará os concertos de María Toro Trío e de Kin García Quinteto, así como a proxección do documental “A film about kids and music: Sant Andreu Jazz Band” e o faladoiro “Dende Galicia para o Mundo”. No acto estiveron presentes o concelleiro de Cultura e alcalde de Ames, Blas García; a técnica do departamento de Cultura, María Vázquez; o director artístico de Ames Jazz, Xacobe Martínez; e o músico Kin García.