O salón de plenos da Casa do Concello acolleu o pasado martes , 25 de xuño, unha nova xuntanza do Consello Escolar Municipal de Ames, onde o Goberno presentou unha proposta sobre a modificación da Ordenanza fiscal reguladora da taxa pola prestación dos servizos complementarios educativos e de conciliación así como do borrador para a modificación do Regulamento da Rede municipal de comedores escolares, Bos Días Cole e Tardes Divertidas. Dita proposta recolle engadir novos tramos ás cotas de comedor, incrementalas en comedor, lúdicos e Escola de verán entre o 10,5%-11% e non modificar os programas Bos Días e Tardes Divertidas durante o curso 2024-2025. Nos seguintes cursos modificarase a ordenanza para todos os servizos de conciliación conforme ao IPC.

A Corporación municipal aprobou por unanimidade o crédito extraordinario 1/2024, o proxecto de mellora da mobilidade no parque empresarial do Milladoiro, a primeira prórroga do lote 1 do servizo de monitores e persoal na rede de comedores escolares e do lote 3 de servizo de monitores e merendas no programa de Tardes Divertidas. Tamén se aprobou por unanimidade o expediente para a elección de xuíz/a substituto/a do Concello de Ames, o convenio de colaboración para a xestión compartida da promoción turística da ruta rosaliana As pegadas de Rosalía e a modificación da ordenanza para a protección dos camiños e vías públicas municipais do concello de Ames. Por último, aprobouse por maioría absoluta a corrección de erros no texto da ordenanza reguladora do prezo público pola prestación do servizo das escolas infantís municipais. Podes ver a gravación do pleno na canle de Youtube do Concello de Ames.

Hoxe, xoves 27 de xuño, o Pazo da Peregrina acolleu a sesión de clausura do Obradoiro de acollemento lingüístico “En galego, co teu acento”, que se desenvolveu en Bertamiráns do 3 ao 27 de xuño. Dez persoas de nacionalidades e orixes diversas participaron no taller, no que puideron aprender máis sobre a lingua e a cultura galega. O obradoiro, no que colaboran as concellarías de Normalización Lingüística e de Benestar Social, rematou coa entrega duns diplomas e con palabras de agradecemento mutuas e en galego. Xa está aberto o prazo de inscrición para este mesmo obradoiro, pero para a quenda que se vai impartir do 1 ao 24 de outubro na Casa da Cultura do Milladoiro.

O programa de verán “Seráns de Ames”, desenvolvido por primeira vez no 2021 na praia fluvial de Tapia, aumenta nesta edición as súas propostas e engade coma sedes as parroquias de Biduído e Agrón, ampliando deste xeito a programación. O departamento de Bibliotecas, coa colaboración do de Mocidade, Cultura e Normalización Lingüística, organiza un conxunto de oito actividades que se reparten entre catro parroquias, e que terán lugar todos os xoves de xullo e agosto a partir das 19:00 horas. Premendo nesta ligazón pódese consultar o cartaz dos “Seráns de Ames”.