Actualidad
Lunes, 23 de diciembre de 2019
A Casa da Cultura do Milladoiro acolle este xoves, 26 de decembro, ás 18.00 horas, o espectáculo musical da “Feira das Linguas”, que está dirixido a un público familiar. Trátase dunha obra de teatro musical para que as nenas e os nenos se acheguen á historia da lingua desde os ritmos máis actuais, co obxectivo de promover o galego entre as novas xeracións. As entradas para esta actividade, que se enmarca dentro do programa Apego, poden mercarse na billeteira electrónica do Concello de Ames.
Sábado, 21 de diciembre de 2019
O obradoiro de lingua e cultura, “En Galego co teu acento”, pon fin a esta edición despois de desenvolverse durante o mes de outubro en Bertamiráns e durante o mes de novembro no Milladoiro. A través desta actividade, dirixida a persoas de fóra de Galicia, pretendeuse que os/as participantes adquirisen nocións básicas de lingua e cultura galegas para contribuír á súa integración.
Viernes, 20 de diciembre de 2019
A Casa da Cultura de Bertamiráns acolleu este xoves, 19 de decembro, a gala de entrega dos premios da novena edición do concurso de teatro lido de Ames, Desata a Lingua!. A concelleira de Mocidade e Normalización Lingüística, Escarlata Pampín, e o concelleiro de Educación, David Santomil, foron os encargados de entregar os premios aos gañadores durante a gala, conducida por Isabel Martínez-Risco e María Ángeles Bañobre, de Ibuprofeno Teatro. Os grupos Sacarina, Sardiñas Armadas e Raíces de Amizade alzáronse como os gañadores desta edición.
Miércoles, 18 de diciembre de 2019
A gala de entrega de premios do IX Concurso Radiofónico de Teatro Lido de Ames “Desata a Lingua” levarase a cabo este xoves, 19 de decembro, ás 20.00 horas, no auditorio da Casa da Cultura de Bertamiráns. Despois da emisión das pezas dos 21 grupos participantes en Ames Radio, e de que a audiencia decidira que grupo obterá o premio do público, a través dos seus votos, nesta gala daranse a coñecer aos gañadores do concurso, á que asistirá todo o alumnado participante. Ademais do premio do público, haberá premio para o mellor guión orixinal e para a mellor interpretación.
Miércoles, 11 de diciembre de 2019
Este sábado, 14 de decembro, realizarase no campo da festa de Biduído o festival SolporSon de Ames, no que dende as 17.00 horas haberá batalla de galos (regueifa moderna) e unha exhibición de grafite. O festival estará presentado pola xornalista, Paula Señarís. Dende as 19.30 horas actuarán os grupos Náiade, Triska, Monoulious Dop, De Vacas, Biribirlocke e Sondarúa. Tres destas bandas musicais: Náiade, Triska e Biribirlocke son grupos locais de Ames. Náiade e Triska, que ensaian na Factoría, debutan actuando nun festival. Trátase dunha nova iniciativa posta en marcha dende a Concellaría de Mocidade e Normalización Lingüística, que xorde das xuntanzas realizadas cos mozos e mozas dentro da Comisión de orzamentos participativos. Haberá actividades de cultura urbana e moita música, así como unha carpa e un canón de calor.
Jueves, 05 de diciembre de 2019
O Picadiscos MariFaltri chega ao Concello de Ames o próximo venres 13 de decembro. Estará no Pazo da Peregrina de Bertamiráns a partir das 18.00 horas, onde pinchará música infantil para os máis pequenos da casa. Para asistir á actividade é necesario inscribirse enviando un correo electrónico a normalizacion@concellodeames.gal .
Miércoles, 04 de diciembre de 2019
O pasado venres, 29 de novembro, realizouse a entrega de premios do proxecto Youtubeir@s no Teatro Principal de Santiago de Compostela. Patricia de Lorenzo, o DJ Manu TF e a graffiteira Iria Fafián animaron a gala dos Premios Youtubeir@s, na que houbo 27 finalistas. Nesta terceira edición concorreron 252 vídeos e canles participantes. Youtubeir@s é unha iniciativa organizada polos servizos de Normalización Lingüística dos concellos da Baña, Ames, Carballo, Cedeira, Moaña, O Grove, Ourense, Ribadeo, Pontevedra, Rianxo, Santiago e Teo, das universidades da Coruña, Santiago e Vigo e da Deputación da Coruña.
Lunes, 25 de noviembre de 2019
Este venres, 29 de novembro, terá lugar a entrega de premios do proxecto Youtubeir@s no Teatro Principal de Santiago de Compostela. Patricia de Lorenzo, o DJ Manu TF e a graffiteira Iria Fafián animarán a gala dos Premios Youtubeir@s, aos que aspiran un total de 27 finalistas entre os 252 vídeos e canles participantes que concorreron nesta terceira edición. As entradas son gratuítas e pódense retirar no despacho de billetes do Teatro Principal no horario de 18.00 a 20.00h. Youtubeir@s é unha iniciativa organizada polos servizos de Normalización Lingüística dos concellos da Baña, Ames, Carballo, Cedeira, Moaña, O Grove, Ourense, Ribadeo, Pontevedra, Rianxo, Santiago e Teo, das universidades da Coruña, Santiago e Vigo e da Deputación da Coruña.
Sábado, 23 de noviembre de 2019
O xurado do Premio Lingua e Empresa decidiu por unanimidade outorgar o premio ex aequo e repartir o importe económico a partes iguais entre tres empresas: Petiscos Gastrobar de Bertamiráns, Cenlitrosmetrocadrado do Milladoiro e Escola de Estudos Musicais Allegro tamén do Milladoiro.
Miércoles, 20 de noviembre de 2019
O Día Universal do Neno, que se celebra todos os anos o 20 de novembro, é un día dedicado a todos os nenos e nenas do mundo. Así, hoxe é un día para que todo o mundo coñeza os dereitos dos nenos e para lembrar a importancia de traballar para conseguir o benestar de todos os nenos e nenas do mundo, comezando polos do noso concello. Con motivo de dita conmemoración o Servizo de Normalización Lingüística de Ames quere festexalo animando ás familias a non privar ás crianzas do dereito a adquirir a nosa lingua. Así, hoxe procedese á emisión da historia de Ánxela e Ben, unha das primeiras familias que se sumou ao programa Apego de Ames e que hoxe viven en Dinamarca.
- ‹ anterior
- 32 de 36
- siguiente ›