[08-09-2018] A próxima semana abre o segundo prazo de inscrición nas Escolas Culturais para o curso 2018/2019. A período de inscrición permanecerá aberta do 10 ao 14 de setembro, para apuntarse naquelas actividades e grupos nos que quedan prazas libres. O proceso de inscrición pódese realizar de xeito presencial na Casa da Cultura do Milladoiro e no Pazo da Peregrina de Bertamiráns, en horario de 9.00 a 14.00 horas. As clases comezarán a semana do luns 1 de outubro e rematarán o 31 de maio de 2019. As persoas interesadas poderán solicitar máis información chamando ao número de teléfono 981 535 940 ou enviando un correo ao enderezo de correo electrónico cultura@concellodeames.gal. A túa dereita, baixo o apartado de descargas, poderás obter un folleto informativo e consultar as prazas libres de cada unha das actividades ofertadas.

[07-09-2018] Este xoves, 6 de setembro, celebrouse o pleno ordinario correspondente ao mes de agosto no que a Corporación municipal aprobou por unanimidade a adhesión ao convenio de colaboración subscrito entre a Xunta de Galicia, a FEGAMP e o SEAGA, en materia de prevención e defensa contra os incendios forestais, para o establecemento dun sistema público de xestión da biomasa nas faixas secundarias. Outros dos temas que se aprobou por unanimidade foi a adhesión ao Protocolo Xeral de Actuación entre a Xunta de Galicia e a FEGAMP, para fomentar a implantación e fixación de empresas en Galicia, mediante a posta en marcha da iniciativa “Concellos Doing Business Galicia”. Tamén se aprobou por unanimidade a elección do xuíz de paz substituto do Concello de Ames e unha moción presentada por Ames Novo sobre os comedores escolares municipais.

[07-09-2018] Os regatistas da Solitaire Urgo Le Figaro exerceron de peregrinos en Santiago, visitando a capital de Galicia e tendo por escenario da foto oficial desta segunda etapa, a Catedral compostelá. Os regatistas de Le Figaro fixeron de peregrinos en Santiago dende a Ría de Muros-Noia. Gran expectación este sábado para a gran saída da terceira etapa ata Saint Gilles Croix de Vie. A concelleira de Turismo do Concello de Ames, Isabel González, asistiu a dito acto de promoción que se celebrou esta mañá, ás 12.30 horas, na praza do Obradoiro.

[06-09-2018] Dende o pasado 1 de decembro de 2017 estase desenvolvendo a décima edición do programa integrado para o emprego “InserAmes Brión”. Nesta ocasión aténdese a 85 participantes dos concellos de Ames e Brión, desempregados e menores de 30 anos. Transcorridos xa 9 meses dende o inicio do programa, estase planificando as actividades e cursos que se van a impartir durante os meses de setembro, outubro e novembro. Ata o 30 de novembro deste ano, data na finaliza este programa, continuarase traballando cos participantes no seu itinerario personalizado de emprego. Actualmente atópanse traballando 38 participantes, o que supón un 44,7% do total. Máis ao longo do programa xa tiveron algún contrato 46 participantes, é dicir, o 55% dos mesmos.