[24-08-2018] O departamento de Persoal fai público o anuncio coa constitución e baremación da fase de concurso do proceso selectivo para a creación dunha bolsa de traballo de asesor xurídico de urbanismo. O exame de galego realizarase o día 30 de agosto de 2018. Premendo no enlace que está a túa dereita, baixo o apartado de descargas, poderás obter dito anuncio.

[23-08-2018] O Concello de Ames informa de que dende onte mércores, 22 de agosto, e durante o prazo dun mes, se poden solicitar as axudas dos programas de fomento de mellora da eficiencia enerxética, sustentabilidade, conservación e accesibilidade das vivendas do Plan estatal de vivendas 2018-2021. A Xunta de Galicia destina máis de 12,3 millóns de euros a estas axudas, dirixidas aos propietarios das vivendas a rehabilitar, as comunidades e agrupacións de propietarios, cooperativas, empresas construtoras ou arrendatarias ou concesionarias de edificios de vivendas. Tamén poderán beneficiarse das subvencións os arrendatarios da vivenda que realicen a rehabilitación de acordo co propietario.

[23-08-2018] A contorna da piscina descuberta municipal do Milladoiro acolleu este mércores unha Tarde de Té coa que a Asociación Solidariedade Galega co Pobo Saharauí (SOGAPS), en colaboración co Concello de Ames, achegou á veciñanza amesá a cultura do pobo saharauí. Os nenos e nenas saharauís que pasan os meses de verán en Ames, a través do programa Vacacións en Paz, exerceron de mestres de cerimonia dunha xornada na que se puido gozar da música e bailes saharauís, xogos populares, tatuaxes de henna e a tradicional cerimonia de té.

[22-08-2018] A convocatoria de inscrición de proxectos para a segunda edición do Festival Internacional Cinema Crianza, que se celebrará en novembro, permanecerá aberta ata o próximo 31 de agosto. Nela poderán inscribirse curtametraxes como longametraxes pertencentes a xéneros de ficción, documental ou animación, sempre que sexan obras orientadas a un público infantil. A inscrición ao festival é gratuíta, e deberá realizarse a través da plataforma FilmFreeWay ou Festhome, ás que tamén pode accederse por medio da páxina web www.cinemacrianza.com.