[01-09-2018] O Concello de Ames, a través das Concellarías de Normalización Lingüística e de Servizos Sociais, abre este luns, 3 de setembro, o prazo para inscribirse nunha nova edición dos Obradoiros de Lingua e Cultura "En galego, co teu acento!. Trátase dunha actividade gratuíta de 30 horas de duración que se desenvolverá de luns a venres nas localidades de Bertamiráns e do Milladoiro, durante os meses de outubro e novembro. Ofrécense un total de 40 prazas (20 para cada localidade). O prazo de inscrición estará aberto ata o 26 de setembro.

[31-08-2018] Premendo nas ligazóns que están a túa dereita, baixo o apartado de descargas, poderás obter os menús dos almorzos e do xantar que se servirán no Setembro Lúdico. Este servizo desenvolverase ao longo dos días 3, 4, 5, 6, 7, 10 e 11 de setembro, en horario de 07:30h a 16:00 horas, tanto no Milladoiro como en Bertamiráns. Os menús están elaborados pola nutricionista municipal.

[31-08-2018] Co obxectivo de dar asesoramento as mulleres que sofren violencia ou que están en risco de sufrila, o Centro de Información á Muller (CIM) de Ames pon en marcha un programa enfocado ao empoderamento da muller para a prevención e o tratamento integral das violencias machistas, a través da intervención terapéutica e de diferentes accións psicoeducativas. O programa, que conta con tres tipos de actuacións (grupos de traballo, mañás temáticas e tardes temáticas), ofrece ferramentas que favorezan cambios nas vidas persoais e familiares imprescindibles para asegurar a recuperación integral da muller e poder, así, comezar un novo proxecto vital.

[31-08-2018] A subdelegada do Goberno na Coruña, Pilar López-Rioboo, e mailo alcalde de Ames, José Miñones, presidiron esta mañá a Xunta Local de Seguridade, unha reunión na que se analizou a seguridade cidadá no municipio. A subdelegada do Goberno da Coruña comprometeuse a reforzar o dispositivo de seguridade da Garda Civil. Asemade, Pilar López-Rioboo destacou a coordinación dos corpos policiais e da Garda Civil como elemento clave para unha mellor seguridade cidadá. En dita xuntanza tamén estiveron representantes da Guarda Civil e do Corpo Nacional de Policía adscrita á Xunta de Galicia, así como varios representantes municipais.