O Concello de Ames e mailas asociación de comerciantes e empresarios do municipio puxeron en marcha a campaña "Ilumina o teu sorriso", a través da cal se pretende promocionar o comercio local. Deste xeito, ponse en marcha un concurso de fotografía no que haberá que facer catro fotos en diferentes lugares de Bertamiráns e do Milladoiro. Entre os participantes sortearase un teléfono móbil de última xeración. O obxectivo é conseguir que a veciñanza de Bertamiráns se desprace ao Milladoiro e viceversa, para fomentar as actividades de Nadal na rúa ao tempo que se merca nos establecementos comercias amesáns.

O Concello de Ames participa outro ano máis na campaña de esquí que organiza a Deputación da Coruña entre o 31 de xaneiro ao 3 de febreiro. Está destinada a rapaces de 11 a 15 anos, ambos inclusive, cumpridos ata o 31 de decembro de 2020. Desta maneira, os participantes gozarán de 4 días na estación invernal de Cabeza de Manzaneda, ademais de cursos de esquí e outras actividades complementarias. Ofértanse 13 prazas para o Concello de Ames.

Dende o departamento de Educación informáselle ás familias usuarias sobre o cobro dos recibos dos servizos complementarios municipais. O día 21 de novembro cobraranse os recibos da Escola de Verán de 2019 e do Setembro Lúdico de 2019, mentres que o día 25 de novembro cargaranse os recibos dos servizos de Comedores Escolares, Bos días Cole e Tardes divertidas do mes de setembro de 2019.

O Concello de Ames vén de poñer en marcha a terceira edición do obradoiro de emprego dual Renova Ames-Brión III. Este obradoiro terá unha duración de 9 meses e contará con 20 alumnos/as traballadores/as (15 de Ames e 5 de Brión) e 5 persoas que formarán o equipo que dirixirá dito obradoiro (1 director/a, 2 mestres/as de instalación solar fotovoltaica, 1 titor/a orientador/a e 1 auxiliar administrativo). Descarga as bases para a selección do alumnado traballador e persoal do obradoiro de emprego Renova Ames Brión III.