A localidade de Bertamiráns acolle o domingo, 22 de decembro, a partir das 11.00 horas, a décimo sétima edición da Carreira Ciclista do Pavo. Organizada pola Asociación Galega de Ciclistas, en colaboración coa Federación Galega de Ciclismo e co Concello de Ames, nela participarán tanto adultos como os máis pequenos da casa. As inscricións para os/as ciclistas federados/as poden facerse na páxina web da federación (tamén o poden facer o propio día da carreira), mentres que as persoas non federadas teñen que enviar un correo electrónico a begonaalonso@mundo-r.com ou chamar ao  número de teléfono 677 555 748. Em ambos casos as inscricións poden tramitarse ata o venres 13 de decembro.

As personaxes de "Disney" volverán unha ano máis aos principais núcleos urbanos de Ames para visitar aos máis cativos do municipio nestas datas. A súa primeira parada será no Centro Social do Milladoiro o venres 27, en horario de 11.00 a 13.30 horas pola mañá e de 17.00 a 19.30 horas pola tarde.

Unha das novidades deste ano no programa de Nadal en Ames é a carreira de obstáculos “Gladiator Kids” o sábado 28, ás 16.30 horas na Área deportiva do Milladoiro. Unha actividade dirixida aos pequenos de entre 3 e 12 anos na que poñerán a proba a súa resistencia e forza con retos adaptados a eles. Con todo, os pais tamén poden inscribirse para participar e pasar así unha xornada familiar diferente.

Os Reis Magos tamén visitarán as diferentes localidades de Ames, comezando polos dous núcleos urbanos do Milladoiro e Bertamiráns o venres 3 de xaneiro, de 16.30 a 20.00 horas e o sábado 4, pola mañá de 11.30 a 14.00 horas e pola tarde de 16.30 a 20.00 horas. O domingo 5 os Reis Magos percorrerán as diferentes parroquias de Ames.