A visita á plantación de patacas de Agropecuaria NELA de Coristanco, membro da iniciativa Slow Food de Compostela, un dos provedores da Rede de Comedores Escolares de Ames, enmárcase dentro das actividades do CEIP A Maia que combinan formación e lecer. O obxectivo neste caso foi que a rapazada coñecese o proceso de sementeira, cultivo, tratamento e colleita da pataca de Coristanco e a IXP Pataca de Galicia.

Os/as escolares tiveron logo a oportunidade de ver outras fincas dedicadas ao cultivo da variedade Kenebeck e Fina de Carballo en Nogueira e de visitar o refuxio natural de Verdes, no río Anllóns. A torre medieval de Nogueira formou tamén parte do itinerario da excursión escolar.

Para o concelleiro de Educación, David Santomil, estas iniciativas que traballan coa variedade de pataca de Coristanco "son exemplo de sustentabilidade e propician un consumo de proximidade dunha calidade excelente que, ademais, favorece o desenvolvemento local". Santomil cre que visitas como estas son moi importantes para a educación ambiental porque "axudan á formación dos nenos e das nenas como consumidores conscientes e responsables".

A concellaría de Educación ten previsto realizar diferentes visitas aos provedores de comedores escolares para dar a coñecer entre o alumnado a importancia da calidade e dos produtos de proximidade.