A praza do Concello acolleu esta mañá a presentación da programación de outono da Aula da Natureza. Ao acto acudiron o alcalde de Ames, Blas García; o concelleiro de Xestión do Medio Natural e Atención ao Rural, Javier Antelo; e maila técnica responsable da Aula da Natureza, Patricia Reboreda, que explicaron cada unha das actividades que compoñen dita programación, que se desenvolverá nos meses de outubro e novembro.

O alcalde de Ames, Blas García, destacou que “a Aula da Natureza no noso concello é un referente en canto a actividades nesta época do ano. Esta extensa programación comezou fai unha semana coa limpeza dos ríos e contará este ano cunha importante novidade como son as rutas teatralizadas, que servirán para achegar á veciñanza ao rural e o rural á veciñanza”. Ademais engadiu “é fundamental implicar á mocidade para que coñezan o seu entorno, especialmente a aqueles que viven nos núcleos de Bertamiráns e do Milladoiro. Moitas veces son os propios rapaces e rapazas os que lle dan a coñecer aos máis maiores estas zonas do concello de Ames grazas a este tipo de actividades”.

O concelleiro de Xestión do Medio Natural e Atención ao Rural, Javier Antelo, explicou que “o obxectivo é facer as actividades dentro do concello para dar a coñecer e poñer en valor todos os espazos do municipio. Moita xente do Milladoiro, Bertamiráns e outras parroquias non coñecen espazos que temos con gran valor natural e etnográfico. Este ano temos como novidade a actividade `Castaña que cae no camiño´, que pretende poñer en contacto aos máis novos con este froito e cos castiñeiros. Ademais, dentro da programación hai outras actividades para dar a coñecer os produtos típicos desta época do ano”.

A técnica responsable da Aula da Natureza, Patricia Reboreda, indicou “procuramos sempre chegar a un amplo abanico de idades, para que todas as persoas que queiran participar o fagan. Animamos a toda a veciñanza a apuntarse a estas actividades”.

Programación de outono
Cómpre dicir que a XVI xornada de limpeza simultánea en ríos, celebrada o pasado domingo 24 de setembro, tamén forma parte de dita programación. Nesta actividade participaron 30 persoas voluntarias que percorreron dous quilómetros de diferentes tramos de ríos e regatos que pasan polo concello amesán. Deste xeito, limparon 500 metros de cada un destes ríos e regatos: Ameneiral, Rego dos Pasos, Tambre e Rego do Andoriña. O rango de idade das persoas participantes foi diversos, incluíndo voluntarios/as dos 2 ao 60 anos. A limpeza realizouse durante dúas horas e destacou a significativa participación de adolescentes e rapaces e rapazas. En xeral, todas as persoas que participaron na actividades mostraron un grande interese na limpeza dos ríos e coidado do medio natural.

Cogomelos de Ames
No mes de outubro comezan as saídas para recoller cogomelos. Co fin de difundir o curioso mundo dos fungos ao tempo que amosar as paisaxes de Ames, a Aula da Natureza organiza catro saídas didácticas polas parroquias amesás de Bugallido, Lens, Ameixenda e Agrón. Ademais, durante a celebración da feira Tanto Monte / Monte Tanto farase unha exposición e degustación de cogomelos. O obxectivo é chegar ao maior número de persoas polo que as saídas realizaranse os sábados e domingos en horario de mañá ou de tarde.

A primeira saída será pola parroquia de Bugallido o domingo 8 de outubro, en horario de 11.00 a 17.00 horas. O sábado, 4 de novembro, farase unha exposición e degustación de cogomelos na feira Tanto Monte / Monte Tanto. O día seguinte, o domingo 5 de novembro, haberá unha nova saída, desta volta pola parroquia de Lens, en horario de 10.00 a 14.00 horas. O sábado 18 de novembro recolleranse cogomelos pola parroquia da Ameixenda, de 11.00 a 17.00 horas. A última saída será o sábado 25 de novembro cunha saída pola parroquia de Agrón, de 10.00 a 14.00 horas.

Trala saída ao monte e despois dun pequeno descanso para comer, farase unha recompilación e estudo detallado das especies atopadas. Trátase dunha actividade familiar que está dirixida a todos os públicos. Ofértanse 40 prazas para cada saída. A inscrición para participar nestas actividades xa está aberta e pecharase o 22 de novembro. Haberá servizo de autobús. Os horarios e paradas serán facilitadas aos participantes.

Castaña que cae no camiño... é para o veciño
Esta é unha das principais novidades que se inclúen na programación de outono deste ano. Trátase dunha saída para recoller castañas que inclúe un magosto e unha charla – coloquio. Será o sábado 14 de outubro.  De 11.30 a 14.00 horas farase unha saída para recoller castañas polos camiños da parroquia de Piñeiro. De seguido, de 14.00 a 15.30 horas, haberá un xantar conxunto no local social de Piñeiro (cada participante ten que levar a súa propia comida). Tralo xantar, de 15.30 a 16.30 horas, realizarase un magosto e tamén haberá un obradoiro infantil. Para pechar a programación de dita actividade, impartirase de 16.30 a 17.30 horas, a charla – coloquio As castañas do meu castiñeiro. As persoas que así o desexen poderán asistir de xeito individualizado a calquera das actividades da xornada.

Os nenos e nenas poderán asistir acompañados por persoal da Aula da Natureza. Trátase dunha actividade que tamén está dirixida a todos os públicos. A inscrición estará aberta ata o 12 de outubro. Haberá servizo de autobús dende O Milladoiro, Bugallido e Bertamiráns.

Acampada na Aula da Natureza
Para o sábado 21 e domingo 22 de outubro está programada unha acampada nas instalacións da Aula da Natureza, que tratará sobre os froitos de outono e noite de candeas. Esta actividade está dirixida a rapaces e rapazas de 8 a 14 anos e desenvolverase dende as 17.00 horas do sábado ata as 14.00 horas do domingo. Ofértanse 25 prazas. Os nenos e nenas deberán levar a cea, saco de durmir, roupa cómoda e se queren unha esterilla (isto é opcional).

Conservas de froitas e hortalizas
Para o sábado 11 e domingo 12 de novembro están programados dous obradoiros de froitas e hortalizas que se impartirán nas instalacións da Aula da Natureza. Trátase de actividades enfocadas ao aproveitamento de froitas e verduras de tempada. O sábado 11 haberá un obradoiro de conservación con azucre: marmeladas, confituras, almíbares... O día seguinte, o domingo 12, realizarase un segundo obradoiro, neste caso sobre a conservación de hortalizas: salmoiras, aceites...

Os dous obradoiros impartiranse en horario de 11.00 a 13.30 horas e de 16.00 a 19.00 horas. As persoas que participen poden levar comida da casa para xantar. Estes obradoiro están dirixidos a persoas de 16 anos en diante. As inscricióna poden realizarse ata o 8 de novembro. Haberá servizo de autobús. Os horarios e paradas serán facilitados aos participantes.

III Feira Tanto Monte / Monte Tanto
Por outra banda, estase traballando na organización da terceira edición da feira Tanto Monte / Monte Tanto, que está prevista para o sábado 4 de novembro no campo da festa de Trasmonte. Trátase dun evento co que se pretende valorizar e difundir a importancia social, ambiental, cultural e económica do monte. Haberá expositores de mel, cogomelos, aceite, embutidos, cestería, noces, castañas, froitos do bosque... e unha gran variedade de produtos que nos ofrece o monte. Para participar na feira non é preciso inscribirse e está aberta a todos os públicos.

Ruta teatralizada polo rego da Andoriña: natureza, historia e saúde   
Outra das novidades na programación de outono deste ano é a organización de dúas rutas teatralizada polo rego da Andoriña, que xirarán arredor da natureza, da historia e da saúde. Serán os días 21 de outubro e 19 de novembro. Elaborarase un programa específico para ditas rutas que será presentado proximamente.

Para inscribirse nas actividades da programación de outono hai que enviar o impreso de inscrición ao enderezo auladanatureza@concellodeames.gal indicando a actividade ou actividades nas que se quere participar. Haberá que enviar un impreso de inscrición por persoa. Para máis información pódese chamar ao número de teléfono 660 00 46 65.

• Vídeo de presentación da programación de outono 2023 da Aula da Natureza.

Novas relacionadas:

Ames Go: "A Aula da Natureza de Ames presentou a súa programación de outono"