O Mes do Libro celebrarase con obradoiros, presentacións de libros, música e actividades. Ademais, polas compras realizadas nalgunhas das librarías de Ames dende o 1 ata o 24 de abril, entrarase un sorteo de bonos de libros. Os establecementos que participan nesta iniciativa son Huargo Artis, Lenda e Máinome, en Bertamiráns, e Nenos e Nais e O Tinteiro, no Milladoiro.
Entre o 5 e 21 de abril, os rapaces e rapazas poderán participar nun concurso de debuxo sobre o libro e a lectura. Os participantes deberán enviar a súa obra ao email biblioteca@concellodeames.gal.

Obradoiros
As bibliotecas municipais organizaron catro obradoiros dirixidos a rapaces e rapazas de 3º a 6º de Educación Primaria.
Hoxe, venres 9 de abril, realizarase o obradoiro infantil "Creacontos". Os nenos e nenas, de entre 9 e 12 anos, poderán desfrutar desta actividade na biblioteca do Milladoiro, a partir das 17.30 horas.

Trátase dun obradoiro creativo no que se empregarán todas as vertentes posibles á hora de contar un conto. É dicir, os pequenos e pequenas xogarán, falarán, escribirán e farán manualidades. Des xeito preténdese aproveitar ao máximo os contos contados e entendidos de maneira tradicional.

O sábado 10 de abril celebrarase o obradoiro "Os contos a debate". Esta actividade terá lugar no auditorio da Casa da Cultura ás 11.00 horas.
Neste obradoiro farase unha análise dende a perspectiva de xénero dos contos e materiais educativos e ofrecer propostas de contos baseados na igualdade e na prevención da violencia de xénero.

O último obradoiro será “Autores con pegada”. O sábado 17 de abril realizarase na biblioteca do Milladoiro e, o sábado 24, na de Bertamiráns. Amabas sesións celebraranse ás 11.30 horas.
Para as actividades o prazo de inscrición estará aberto dende o luns 22 de marzo. Débese chamar ao número de teléfono 981 530 807 ( biblioteca do Milladoiro), ao 981 884 829 (Bertamiráns) ou enviar un correo electrónico ao enderezo biblioteca@concellodeames.gal.

Presentación de libros
O Pazo da Peregrina será o escenario escollido para a presentación de catro obras xunto coa dos Premios do certame Literario de Ames 2020.

O xoves 8, ás 20.00 horas, Carlos Negro presentará o seu libro “Non canta paxaros neste bosque”. O día 15 de abril, á mesma hora, María López Sande e Marilar Alexandre asistirán coa súa obra “Movendo os marcos do patriarcado: O pensamento feminista de Emilia Pardo Bazán”.

“O soño de Liam”, unha obra infantil escrita por David Navarro, será presentada o venres 16 de abril ás 17.30 horas. O xoves 22, ás 20.00 horas, Tomás Guerrero presenta “As súas obras en banda deseñada”.

Por último, o xoves 29 de abril ás 19.00 horas, realizarase o evento dos premios do certame Literario de Ames 2020.
Día do Libro, 23 de abril

O venres 23 de abril celébrase o Día do Libro. Por este motivo, as bibliotecas teñen organizadas unha serie de actividades durante toda a xornada. Comezarán ás 17.00 horas cun contacontos infantil realizado por Bea Campos e seguirase, ás 18.00 horas, cuns obradoiros para nenos e nenas.

Ás 19.00 horas entregarase o premio do debuxo sobre o libro e a lectura.

A xornada rematará cunha actuación musical baixo o nome “Soñando inventei”. O espectáculo, ás 20.00 horas, estará a cargo de María Faltri e Jorge Juncal.

Novas relacionadas:

El Correo Gallego: "Obradoiros máis bonos amesáns para animar á lectura"