O departamento de Bibliotecas de Ames organiza deste xeito o que é o seu segundo encontro literario do 2022, unha das súas principais actividades de animación á lectura para as persoas adultas. Con anterioridade, interviran os autores Salvador Lladó, Emma Pedreira, Alfredo Conde e Xosé Luís Santos Cabanas, mentres que a sesión do pasado mes de xaneiro foi dedicada a unha obra colectiva monográfica sobre Xela Arias, a autora homenaxeada no Día das Letras Galegas 2021.

“O caso dos amantes de París”, editada por Belagua Ediciones, é unha novela negra que serve como continuación do anterior traballo do autor, “O caso Quintana”. Ambas están protagonizadas pola detective e estudante de psicoloxía, Laura Mariño, e a súa compañeira de facultade, Sara Porto, que actúa como narradora. Nesta ocasión, e tras alcanzar a fama por resolver o seu caso anterior, Laura vese obrigada a resolver dous novos asasinatos para salvar a súa reputación, nun texto con crítica social e repleto de referencias á “chanson” francesa.

Miguel Alonso (Ferrol, 1984) é un escritor e músico galego. A súa primeira novela, “O caso Quintana”, foi publicada en 2017 e deu inicio a un universo que o autor bautizou como “Os cuartos do cuarto 010”, que continúa na súa segunda novela e que ten como protagonista a Laura Mariño. Na súa faceta musical, forma parte de Minguante, un proxecto de música pop, e da banda infantil Música Miúda, ademais de traballar como profesor de guitarra.

No encontro literario acompañarán ao autor a profesora, contacontos e integrante de Música Miúda, Irene Quinteiro, e a editora de Belagua Ediciones, Edurne Baines. O acto estará presentado pola concelleira de Cultura, Natividade González.