“A teteira de Kabul” fai un percorrido pola vida de Mina, unha cativa que se ve obrigada a deixar o seu fogar por mor do estalido da guerra no seu país, Afganistán. A protagonista comeza entón unha longa viaxe coa súa familia. A pesar das duras condicións que terá que sufrir, coa axuda das historias que lle conta a súa nai irá descubrindo a beleza durante o seu periplo. Mina gardará todas esas historias nunha pequena teteira, e así poderá tirar delas cando precise que os contos a arroupen.

A obra pretende achegar ao público familiar as vivencias das persoas que se ven obrigadas a desprazarse forzosamente, e, dese xeito, lograr entender outras realidades existentes. Así, búscase lograr a reflexión sobre o papel que xogamos como sociedade e país en canto á acollida, e tamén que o público empatice coas persoas que se ven nesa situación. A representación teatral permitiralle aos asistentes viaxar a outros lugares e contar a historia de Minia desde unha perspectiva construtiva e alentadora.

A peza teatral, de Urdime, está organizada pola Asemblea de Cooperación pola Paz en colaboración co Concello de Ames. A estrea realizarase no auditorio da Casa da Cultura de Bertamiráns, o sábado 1 de abril, ás 18:00 horas. As entradas, que son de balde, poden retirarse xa na Billeteira electrónica do Concello de Ames. O espectáculo terá unha duración aproximada de 40 minutos.

Creación e interpretación
A dirección e interpretación da obra corre a cargo de Atenea García e Nicolás Zamorano. Ambos crearon a compañía Xarope Tulú, dedicada a público infantil e xuvenil.

García é actriz, creadora escénica e narradora oral. Ademais, traballa como intérprete para outros proxectos, formando parte, por exemplo, da montaxe de “Neorretranca e posmorriña” ou do espectáculo “Mai mai”.

Pola súa banda, Nicolás Zamorano é músico e escenógrafo. Ademais de colabora en numerosos proxectos musicais, realiza obradoiros de construción de instrumentos para a rapazada. Na actualidade compaxina a súa labor como intérprete, escenógrafo e músico en Xarope Tulú coa súa actividade como técnico de luz e son para outros proxectos.