A Xunta de Goberno Local aprobou o pasado 28 de novembro a concesión de 10.000 euros repartidas en bolsas para 17 deportitas de Ames. Esta liña de axudas está dividida en dos grupos: no grupo A (deportistas de 12 a 17 anos) concedéronse 16 bolsas que suman un importe de 9.300 euros, mentres que no grupo B (deportistas de 18 a 23 anos) concedeuse unha bolsa por importe de 700 euros. Trátase dunha nova liña de achegas para a concesión de bolsas para deportistas do concello de Ames no ano 2024. A finalidade desta convocatoria é apoiar aos/as deportistas individuais de Ames, como medio para promover o deporte do municipio e, desta forma, conseguir logros deportivos para o concello.

O Concello de Ames abre este mércores, 1 de xuño, o prazo para solicitar os carnés de usuario/a das piscinas municipais descubertas de Bertamiráns e O Milladoiro. Os interesados/as poden descargar o impreso de solicitude na web municipal (ao pé desta nova ou no apartado de trámites) e deberán envialo cuberto aos enderezos de correo electrónico: deportes@concellodeames.gal ou deportes.milladoiro@concellodeames.gal. O prezo dos carnés oscila entre os 5 e os 20 euros dependendo das circunstancias de cada usuario/a. As piscinas municipais abrirán do 15 de xuño ao 15 de setembro en horario de 11.00 a 21.00 horas. O prazo de solicitude estará aberto ata o 12 de agosto.

A Concellaría de Deportes celebra este sábado, 29 de febreiro, a súa décimo cuarta Gala do Deporte, o evento que anualmente homenaxea ás máis destacadas e destacados deportistas do concello, así como ás entidades deportivas. O acto contará con actuacións en directo e demostracións das rapazas e rapaces das Escolas deportivas municipais. O evento realizarase na Casa da Cultura do Milladoiro, a partir das 20:30 horas. A Gala será presentada pola xornalista Lorena Pose e polo xornalista Diego Viaño. Neste evento colaboran a Deputación da Coruña, a Xuntanza de Empresarios de Ames (XEA) e a Asociación de Empresario Novo Milladoiro.

Este sábado, 16 de setembro, celebrarase unha masterclass de baile no parque do Ameneiral en Bertamiráns, a partir das 18:00 horas. Trátase dunha actividade aberta e de balde, pensada para nenos e nenas de todas as idades e para as súas familias. Esta iniciativa, organizada pola Escola de Baile Danzaya, en colaboración co departamento de Deportes do Concello de Ames, ten como obxectivo achegarlle á veciñanza a danza nas súas distintas modalidades e fomentar esta práctica deportiva. Para participar non é necesaria inscrición previa.