O vindeiro domingo, 9 de xuño, terá lugar en Santiago de Compostela a sétima edición da Carreira e Andaina Solidarias pola Esclerose Múltiple. O obxectivo desta cita deportiva, que contará con seis categorías, é recadar fondos para a Asociación Compostelá de Esclerose Múltiple (ACEM). As persoas interesadas en participar poden inscribirse ata as 23:59 horas do mércores 5 de xuño a través desta ligazón ou de xeito presencial na sede da asociación. Tamén haberá dorsal 0 para realizar donativos.

O club de atletismo MillaRaio remata a tempada de aire libre con grandes resultados. Despois de obter moi bos resultados no campionato autonómico, o equipo sub14 feminino do clube participará no campionato de España sub14 por equipos esta fin de semana, onde competirá con trinta clubes de todo o país.

O campo de fútbol do Milladoiro acolleu este domingo o Torneo da Amizade, organizado polo Milladoiro SD en colaboración co Concello de Ames.  O evento, disputado a modo de liguiña, contou coa participación do Milladoiro SD, o SD Compostela, As baleas de Camariñas e dous equipos do Spanish Soccer School de Dubai, un dos cales se proclamou vencedor do torneo. A concelleira de Deportes de Ames, Susana Señorís, foi a encargada de entregarlle o trofeo de gañador ao Spanish Soccer School A, así como os agasallos ao resto dos participantes.

O salón de plenos da Casa do Concello acolleu esta mañá a presentación do partido de cuartos de final da XVIII Copa Galicia de fútbol sala feminino, que vai enfrontar ao F.C. Meigas co Pescado Rubén Burela. Dito encontro disputarase este mércores, 2 de outubro, ás 21.00 horas, no pavillón municipal de Bertamiráns. O F.C. Meigas clasificouse para os cuartos de final despois de gañarlle na fase previa ao C.D. Mosteiro de Bembrive. As entradas para poder ver o partido poderanse mercar na billeteira do pavillón dende unha hora antes do inicio do partido.