O alcalde de Ames, Jose Miñones, envioulle esta mañá unha carta ao presidente da Xunta de Galicia, Alberto Núñez Feijóo, para ofrecerlle á Administración autonómica os medios cos que conta o Concello de Ames na actualidade, especialmente os dous pavillóns polideportivos, e as súas salas anexas, situados nos núcleos do Milladoiro e Bertamiráns, para que poidan ser utilizados, no caso de que fose necesario, como hospitais de campaña, ou para calquera outra necesidade que permita facer fronte á pandemia do Coronavirus (COVID-19).

Esta mañá presentouse a nova Escola de tecnificación que vai a poñer en marcha o RC Deportivo da Coruña en Ames, en colaboración co Bertamiráns FC e co Concello. Esta iniciativa enmárcase no convenio de colaboración que teñen subscrito ambos clubs dende o ano 2015. Trátase da primeira Escola de tecnificación que pon en marcha o club coruñés fóra da contorna da Coruña. Esta Escola estará aberta durante os meses de abril, maio e xuño. No caso de que a iniciativa teñan boa receptividade e haxa suficiente participación, a próxima temporada abrirá no mes de setembro. Está dirixida a todos os rapaces e rapazas da contorna de Ames que teñan de 6 a 14 anos. Haberá dúas quendas; unha ás 16.30 e outra ás 17.30 horas. Pódese escoller entre 1 ou 2 horas de adestramento á semana. Haberá que inscribirse como mínimo nun mes.

O Salón de Plenos da Casa do Concello de Bertamiráns acolleu esta mañá a presentación da batería de actividades organizadas polo departamento de Deportes, entre as que se inclúe unha xornada de portas abertas e cursos de piragüismo, así como clases de natación. Estas iniciativas, dirixidas a diversos grupos de idade, terán lugar ao longo dos meses de xuño e xullo, e buscan animar á veciñanza amesá a atopar unha alternativa de ocio saudable no período estival. Para máis información sobre todas as actividades pódese enviar un correo electrónico ao enderezo deportes@concellodeames.gal ou chamar ao número de teléfono 619 842 504.

A concelleira de Deportes, Susana Señorís, o responsable da empresa Emesports, Ezequiel Mosquera, e o director técnico da delegación en Santiago da Federación Galega de Atletismo, Jesús Silva, presentaron esta mañá a vixésima edición da Carreira Pedestre Popular Concello de Ames, que está encadrada dentro do VII circuíto provincial de carreiras populares da Deputación da Coruña. Na presentación tamén participaron representantes dos clubs de atletismo do concello (Millaraio, Sar e Ames atletismo). Este evento deportivo desenvolverase o domingo, 20 de outubro, a partir das 10:30 horas. Contarase cun circuíto de 10 quilómetros homologado pola Real Federación Española de Atletismo. O prazo de inscrición xa está aberto e rematará o mércores 16 de outubro, ás 23.59. Na actualidade xa hai 157 persoas inscritas.