O salón de plenos da Casa do Concello acolleu este pasado luns pola tarde o acto de entrega de premios ás gañadoras e gañadores do XVII concurso de escaparates de Nadal e do I concurso de decoración de Nadal veciñal. O alcalde de Ames, Blas García, a concelleira de Promoción Económica, Ana Belén Paz, e tres dos catro membros que formaron o xurado, foron os encargados de repartir os galardóns, que consistiron nuns trofeos e diplomas. En total repartíronse 6.000 euros entre os gañadores/as. No concurso de escaparates repartíronse catro premios dotados cun total de 4.000 euros (1.500 euros para o primeiro, 1.100 para o segundo, 800 para o terceiro e 600 para o cuarto), mentres que no concurso de decoración veciñal repartíronse outros catro premios de 500 euros cada un.

En pouco máis dunha semana esgotáronse as 3.000 tarxetas-bono da campaña Merc@mes. Esta mañá vendéronse as últimas tarxetas-bono de 50 euros. En total, vendéronse 1.000 tarxetas de 100 euros e 2.000 tarxetas-bono de 50 euros. Esta iniciativa xerará un volume de negocio de 200.000 euros. A campaña desenvólvese en dúas fases. A primeira fase xa está en marcha dende o 1 de marzo e desenvólvese ata o 1 de maio, mentres que a segunda fase será do 1 de setembro ata o 31 de outubro. Cómpre destacar que a realización das compras con ditas tarxetas pódese realizar exclusivamente nestes dous períodos.

O Concello de Ames, a través da Concellaría de Promoción Económica, puxo en marcha por segundo ano consecutivo o concurso Canta con Ames. A presentación do certame realizouse o pasado 6 de maio no auditorio da Casa da Cultura do Milladoiro. O prazo de inscrición para participar no certame está aberto ata o vindeiro 13 de xuño. Existen catro categorías: infantil, ata os 12 anos; xuvenil, de 13 a 20 anos; sénior, de 21 a 40 anos; e súper sénior, de 41 en diante. O concurso está composto de varias fases, que se desenvolverán do 1 de xullo, momento no que comezará a fase de preselección, ao 27 de agosto coa gran final. O certame estará presentado pola xornalista Loli Gómez. O cartel do concurso foi deseñado por Antía Montero Segade, que ten 15 anos e é veciña do Milladoiro.

A concellaría de Promoción Económica e Emprego, en colaboración coas concellerías de Mocidade e Benestar Social e a Xuntanza de Empresarios de Ames (XEA), desenvolven por terceiro ano consecutivo as xornadas “Volta ao cole co comercio”, unha iniciativa que ten como obxectivo dinamizar o comercio e a hostalaría local de cara ao inicio do curso lectivo. Nesta ocasión, a proposta alóngase durante dous días, e comprende actividades para a mocidade e para os cativos e cativas. Así, haberá dúas propostas de tardes lúdicas e sorteos que se desenvolverán o 4 de setembro no Milladoiro e o día 6 en Bertamiráns. Ademais, sortearanse vales de compra no comercio local valorados en 1.500 euros.