A radio municipal de Ames embarcouse nunha nova aventura para seguir en contacto coa veciñanza amesá nestas circunstancias especiais. A través da súa nova páxina de Facebook, a radio municipal seguirá dando voz ás veciñas e veciños, proporcionando ademais información de servizo nestes tempos de confinamento nos fogares. Para todas aquelas persoas que desexen participar neste novo proxecto contando as súas historias, poden poñerse en contacto a través do teléfono 662 377 413 e o enderezo electrónico radio@concellodeames.gal. 

O portal de observación social de ética e transparencia pública Dyntra sitúa ao Concello de Ames como a institución municipal máis transparente de Galicia, e colócao no posto número 88 de España. O Concello conta con 103 indicadores publicados dos 162 que recolle Dyntra, alcanzando así unha porcentaxe do 63,58% no índice DAM (Dyntra Ayuntamientos y Municipios), que inclúe aos municipios de máis de 15.000 habitantes. A avaliación recolle seis apartados, nos cales Ames obtén as seguintes puntuacións: 69,23% en transparencia municipal; 54,55% en participación e colaboración cidadá; 55,56% en transparencia económica-financieira; 75% en contratacións de servizos; 65% en urbanismo e obras públicas e 0% en Open Data.

A emisora municipal Ames Radio emite do 2 ao 5 de decembro, no 107.2 FM, as pezas gravadas polos 21 grupos (7 do IES do Milladoiro e 14 do IES de Ames, en Bertamiráns), que participan no IX Concurso Radiofónico de Teatro Lido de Ames “Desata a Lingua”. A emisión das pezas farase ás 13.30h e ás 21.30 horas. Estes traballos tamén están dispoñibles na sección de AVISOS da páxina web municipal. A audiencia decidirá do 3 ao 8 de decembro a obra que obtén o premio do público, enviando un correo a radioteatro@concellodeames.gal. As persoas que queiran votar deberán identificarse e só se computa un voto por persoa. Ademais deste, haberá dous premios escollidos polo xurado designado polo Concello de Ames: premio ao mellor guión orixinal e á mellor interpretación.

A emisora municipal Ames Radio acolle durante toda esta semana as gravacións das pezas presentadas ao IX Concurso Radiofónico de Teatro Lido de Ames “Desata a Lingua”. En total participan nesta edición 21 grupos (7 do IES do Milladoiro e 14 do IES de Ames ,en Bertamiráns) e serán 69 as rapazas e rapaces de 1º, 2º, 3º e 4º da ESO que se acheguen estes días á emisora municipal para gravar as súas pezas. Organizada polos departamentos de Mocidade, Normalización e Comunicación do Concello de Ames, a actividade pretende dinamizar dun xeito lúdico e a través da creatividade o uso oral e escrito do galego entre a mocidade amesá. Asemade, fomenta o gusto polo teatro e o achegamento á radio municipal.