As obras de teatro, representadas por diferentes grupos teatrais de Ames, Teo, Brión, Outes e Ribeira, representaranse os días 4, 5, 6, 7 e 8 de decembro no auditorio da Casa da Cultura do Milladoiro.  As entradas poden adquirirse xa dende hoxe de xeito gratuíto na Billeteira electrónica. No caso de haber billetes dispoñibles, tamén se poden coller o propio día do espectáculo nos auditorios correspondentes. Todas as representacións teatrais son no auditorio da Casa da Cultura do Milladoiro, ás 20.00 horas, excepto a representación de A Visita, a cargo do Grupo Municipal de Teatro de Ames, que será no local social de Bugallido. Para ver a obra A Visita en Bugallido a entrada é libre ata completar aforo, non é preciso sacar convites na Billeteira como para as outras representacións teatrais que son no auditorio da Casa da Cultura do Milladoiro.

A Aula 10 do Centro multifuncional de Aldea Nova acolleu este venres, 15 de novembro, o acto de celebración do vinte aniversario da Escola Municipal de Música de Ames. Durante o transcurso do acto presentouse a nova imaxe corporativa da EMMA, que foi deseñada pola deseñadora gráfica, Doli Folgar. Houbo diferentes actuacións a cargo do alumnado de linguaxe musical, agrupación de guitarras e Anxo Villanueva, grupos de violíns, frautas, piano, combo de voces e guitarras. Con motivo do vinte aniversario estase traballando nunha programación específica que se publicará proximamente.

Este xoves 14 e venres 15 o festival Cinema Miúdo arranca en Ames coa celebración de sete sesións de cine internacional dirixidas ao alumnado dos centros de ensino de Ames. En total serán 400 nenos e nenas de entre 5 e 15 anos que se achegarán desde as escolas infantís do Milladoiro, as unitarias de Ortoño e Covas; e os CEIP da Maía, Agro do Muíño e Barouta. Todos eles desfrutarán dunha selección de curtametraxes adaptada a cada tramo de idade e deseñada especialmente para eles. A inauguración oficial do festival é o venres 15 ás 17:00 horas coa actuación do pallaso Rudi Dudi e a proxección dos dous primeiros bloques de curtametraxes. O abono para todo o festival ten un prezo de 3,00 € e pode mercarse na Billeteira electrónica do Concelo de Ames.

O vindeiro martes, 12 de novembro, comeza unha nova edición do ciclo Cine de Outono, unha iniciativa encadrada dentro da programación deseñada polo departamento de Cultura do Concello de Ames. Ao longo do mes de novembro proxectáranse os filmes As Neves, +Cuñados e Os Espazos en Branco. Todas elas serán proxectadas no auditorio da Casa da Cultura do Milladoiro os martes 12, 19 e 26 de novembro ás 20.00 horas. Ao final das proxeccións haberá un pequeno coloquio sobre os filmes. As entradas xa se poden adquirir a través da Billeteira electrónica.