A Federación Galega de Municipios e Provincias (FEGAMP) celebrou este xoves, 27 de febreiro, o segundo encontro de alcaldesas e concelleiras onde dialogaron sobre boas prácticas e propostas de futuro para promover políticas locais de igualdade coa mocidade. A concelleira de Planificación e Xestión Educativa e Mocidade, Carmen Porto, participou nunha mesa de debate sobre as boas prácticas en igualdade co foco na mocidade. Estas xornadas celebráronse baixo o lema “A mocidade, forza motriz para a igualdade”, no marco das súas iniciativas da FEGAMP para conmemorar o 8 de Marzo, Día Internacional da Muller.

O Concello de Ames, a través do departamento de Xuventude, organiza unha nova edición do curso de monitor de tempo libre que, desta volta, terá unha duración de catro meses e desenvolverase entre os meses de febreiro e maio. As clases impartiranse no Pazo da Peregrina, en Bertamiráns, en horario de 9.00 a 14.00 e de 15.30 a 20.30 horas os sábados e domingos. O curso está dirixido a maiores de 18 anos que posúan o título de educación secundaria ou equivalente, ou o título de técnico auxiliar en formación profesional. En total, ofértanse un máximo de 25 prazas e o curso ten un prezo de 172 euros por alumno/a. Pódense consultar as bases da convocatoria deste ano na seguinte ligazón.

A Casa da Cultura do Milladoiro acolle este sábado, 23 de novembro, ás 19:00 horas, a gala de entrega de premios do V Certame Galetiktokers, unha iniciativa dos departamentos de Xuventude e de Normalización Lingüística do Concello de Ames, que se realiza por quinto ano consecutivo e que ten como obxectivo fomentar a creatividade da rapazada e animar a creación de vídeos en galego a través das redes sociais e das novas canles de comunicación. Nesta quinta edición presentáronse 39 vídeos, realizados por arredor de 80 mozos/as de Ames e doutras localidades de Galicia. O evento estará presentado e dirixido polas/os creadoras/es de contido en galego, @konachadas e @rodrimiguez97 , e amenizado polo rapeiro amesán Big Meu. A gala é aberta ao público e para reservar praza cómpre confirmar asistencia enviando un correo electrónico ao enderezo: galetiktokers24@gmail.com.  

O Concello de Ames, a través da Concellaría de Mocidade e a Xuntanza de Empresarios de Ames (XEA), organiza a segunda edición da Xincana Xove “Percorrendo Ames 2024”. Tratase dunha iniciativa composta por diversas probas para que a mocidade explore o concello e o coñeza de xeito participativo e divertido. O acto de presentación tivo lugar esta mañá na Casa do Concello. A actividade está dirixida a mozos e mozas entre os 14 e os 30 anos de calquera concello de Galicia, que deberán competir en equipo de tres mozos/as. As inscricións poderán facerse a través deste formulario web.