Do 21 ao 27 de setembro os veciños e veciñas de Ames poderanse preinscribir na nova programación das Escolas deportivas e culturais do Concello de Ames. A xestión realizarase telematicamente a través da plataforma Cronos. Non se admitirá ningún tipo de inscrición presencial. Este ano non se permite a renovación de praza. Todas as persoas que queiran participar nas actividades das Escolas deportivas e culturais terán que facer a preincrición. Nas actividades que haxa máis preinscricións que prazas ofertadas, realizarase un sorteo o 28 de setembro. Non se conceden as prazas por orde de inscrición. A listaxe de admitidos publicarase o 1 de outubro na páxina web do Concello de Ames. Ademais, cada persoa só poderá inscribirse nunha escola deportiva e nunha escola cultural. Non se permite a inscrición en máis dun grupo da mesma actividade.

O Fútbol Club Meigas e mailas Escolas de Fútbol Sala Trasgos organizan unha nova edición do campus de Nadal que se desenvolverá os días 23, 24, 26, 27, 30 e 31 de decembro, en horario de 10.00 a 14.00 horas, no pavillón de Bertamiráns. Haberá servizo de gardería de 9.00 a 10.00 e de 14.00 a 14.30 horas. Na organización de dito evento colaboran o Concello de Ames, a Deputación da Coruña e maila Xunta de Galicia. Está destinado a nenos de entre 4 a 16 anos e a inscrición pode formalizarse na seguinte ligazón.

O Concello de Ames, a través da Concellaría de Deportes, organiza uns cursos de iniciación ao piragüismo durante os meses de xullo e agosto. Esta actividade está dirixida aos nenos/as nados entre o 2006 e o 2012. Esta actividade impartirase os luns, mércores e venres, en horario de 11.00 a 12.15 horas. O prazo para apuntarse xa está aberto. Ofértanse 20 prazas para cada mes. Cómpre salientar que as prazas cubriranse por rigorosa orde de inscrición.

O próximo luns, 22 de xuño, abre o prazo de inscrición para os primeiros cursos de natación deste verán, que se desenvolverán ao longo do mes de xullo. En agosto realizaranse unha nova serie de cursos de natación, para os que será necesario inscribirse entre o 6 e o 17 de xullo. Estas actividades terán lugar de luns a venres, tanto na piscina descuberta de Bertamiráns coma na do Milladoiro. Esta iniciativa está organizada pola Concellaría de Deportes en colaboración coa Deputación da Coruña. Premendo nos enlaces que están ao pé desta nova poderás obter o impreso de solicitude para os cursos de natación.