A nova web municipal inclúe novidades no relativo á Comunicación municipal. Accedendo ao apartado de Atención cidadá, información e participación e premendo na opción de Comunicación municipal chégase as diferentes posibilidades que existen de “Medios de comunicación municipais”.

Dentro dos sistemas personalizados de envío de avisos, actualidade e axenda municipal, destacan a  canle de RSS; envío de boletíns informativos a través do correo electrónico, e a nova canle de Telegram, creada para informar de avisos e de información de interese municipal (apertura de prazos de inscrición, axenda de actividades, publicación de listas, etc.). Para darse de alta na canle de Telegram hai que buscar Concello de Ames e adherirse. A través da nova web tamén se mellorou o servizo de envío de boletíns, que conta con máis de 3.600 usuarios/as, cun deseño máis atractivo.   

Ademais, dentro do apartado de Atención cidadá, información e participación, podemos atopar o servizo de incidencias. De xeito directo, a través dun formulario electrónico, podemos incluír os datos de contacto,  achegar imaxes e a xeolocalización do incidente. Tamén se continuará dando información á veciñanza a través das redes sociais: Facebook e Twitter. O Concello de Ames conta en Facebook con preto de 4.000 usuarios/as, mentres que en Twitter hai preto de 1.300 seguidores. Nos últimos anos as redes sociais municipais experimentaron un forte incremento de usuarios/as.

Mediatec@mes
Ademais, púxose en marcha o novo portal da Mediatec@mes. Trátase dun novo espazo multimedia cos vídeos e fotografías máis destacadas do Concello. Neste espazo hai material multimedia catalogado en diferentes espazos: Plenos, eventos, turismo, administración, cidadanía e galería de imaxes. No apartado de plenos habilitarase no futuro a posibilidade de ver os vídeos dos plenos gravados coa aplicación de videoacta.  Os eventos do concello terán tamén un gran peso de material multimedia, tanto de vídeos como fotografías.