Dentro das actividades do Campus de setembro do Club de Atletismo Millaraio “Correndo cara O Xacobeo”, proxecto cofinanciado pola Xunta de Galicia, dentro do programa “O teu Xacobeo”, os rapaces e rapazas fixeron este mércores, 4 de setembro, a pé o tramo do Camiño Francés partindo desde o Monte do Gozo ata chegar á praza do Obradoiro, compartindo a ruta e interactuando cos diversos peregrinos e coñecendo este percorrido de primeira man.

A experiencia resultou moi positiva, e completarase este sábado, 7 de setembro, cunha actividade para as familias na que se realizará outra andaina, desta vez para coñecer e desfrutar do tramo do Camiño entre Corcubión e Fisterra. O VI Campus de Atletismo MillaRaio “Correndo cara o Xacobeo” desenvólvese do 2 ao 10 de setembro. Trátase dun proxecto cofinanciado pola Xunta de Galicia, dentro do programa “O teu Xacobeo”.

A concelleira de Deportes, Susana Señorís, destaca que o “desenvolvemento destes campus son moi interesantes e resultan de gran aproveitamento para os rapaces e rapazas, xa que lle achegan a coñecer dun xeito máis próximo distintas actividades que se levan a cabo no club, enfocadas no deporte e no lecer, e serven tamén para que nunha semana practiquen distintas modalidades como lanzamento, relevos, etc”.