Esta mañá a concelleira de Normalización Lingüística, Escarlata Pampín, e maila concelleira de Promoción Económica, Ana Belén Paz, presentaron a segunda edición do premio Lingua e Empresa. Esta iniciativa ten como finalidade promover o uso do galego na actividade económica do Concello de Ames, concretamente na actividade empresarial, e recoñecer publicamente a contribución ao aumento e mellora do uso social do galego desde este sector.

Así, valorarase o uso da lingua galega tanto no referente á comunicación externa como á interna. Por exemplo, en ámbitos como a páxina web e redes sociais (se existisen), sinalética e comunicación do establecemento empresarial, na atención ao público, en campañas publicitarias ou materiais de promoción en calquera soporte. Asemade, será tamén de relevancia a comunicación interna co persoal ou entre os diferentes departamentos ou calquera outro mérito que a propia empresa queira salientar neste ámbito.
 
Compre engadir que tamén será tomado en conta o impacto que a actividade empresarial poida ter en sectores especialmente relevantes para o proceso de normalización lingüística. Para a comprobación destes méritos, as empresas candidatas deberán indicar os enlaces de información correspondente ou achegar materiais impresos, e facilitaranlle ao Concello de  Ames toda a información que se lles requira sobre os usos lingüísticos na súa comunicación externa ou interna ou sobre a veracidade dos datos aportados na candidatura.

O galego é un elemento diferenciador
A concelleira de Normalización Lingüística, Escarlata Pampín, fixo un chamamento “a que todas as empresas participen, xa que o idioma galego está nunha situación de perda de falantes que necesita a axuda de iniciativas como esta. Nesta ocasión trátase de involucrar ao comercio local. Os responsables de empresas e comercios deben saber que a utilización do galego nunca resta, senón que é un valor engadido, algo que os diferencia do resto, por iso animámolos a que falen en galego”.
 
Por outra banda, a concelleira de Promoción Económica, Ana Belén Paz, explicou que “a través desta iniciativa queremos poñer en valor a nosa lingua. Sabemos que moitas empresas e comercios xa fan uso do galego nas súa actividades cotiás, pero tamén queremos implicar a outras empresas e comercios a que fagan uso do noso idioma na atención ao cliente, na relación comercial e que o apliquen nas novas tecnoloxías”. Ademais, engade que “o uso do galego non debe de ser un obstáculo, ten que ser un aspecto positivo e de diferenciación comercial”.
 
Resolución do premio: do 15 ao 22 de novembro
A resolución do premio farase pública entre o 15 e o 22 de novembro. Este irá acompañado dunha dotación económica de 2.500 euros, xunto cunha campaña de difusión da empresa gañadora na Radio Municipal de Ames. Ademais a empresa premiada poderá mencionar na súa comunicación a obtención desta distinción e mesmo incluíla na súa publicidade ou papelería.

A presentación dunha candidatura pode realizarse de xeito presencial ou telemático, cubrindo unha instancia xeral e achegando o modelo de ficha  que pode ser descargado ó final desta nova. Os lugares habilitados para a facelo de xeito presencial son a Casa do Concello (Bertamiráns) ou nas oficinas municipais do Milladoiro. Ambos de luns a venres, de 9.00 a 14.00 horas da mañá. No caso de facelo telematicamente, realízase a través da sede electrónica do Concello. O prazo para facelo remata o 31 de outubro ás 14.00 horas.

Para solicitar máis información pódese contactar co Servizo de Normalización Lingüística  (normalizacion@concellodeames.gal/662 377 215) ou co Departamento de Promoción Económica (promocioneconomica@concellodeames.gal / 981 883 002 -ext. 2010).

>>ACCEDE AO TRÁMITE DE PARTICIPACIÓN NO PREMIO LINGUA E EMPRESA

Novas relacionadas:

La Voz de Galicia: "O Concello premia o uso do galego na actividade empresarial"

Compostela 24 horas: "Ames presenta a segunda edición do Premio Lingua e Empresa"