- Tematica
A concelleira de Deportes, Susana Señorís, estivo presente na sinatura do contrato que realizou un representante da empresa Galitec Desarrollos Tecnológicos SL, para executar as obras de rehabilitación da área deportiva de Bertamiráns. A través desta actuación vaise a construír un nova pista de pádel e unha pista polideportiva exterior. Este proxecto foi adxudicado por un importe de 89.353,66 euros. Ademais, adxudicouse o proxecto de reforma dos vestiarios do pavillón polideportivo de Bertamiráns á empresa CYS HISPANIA SL por 54.949,61 euros. En total, destinaranse 144.303,27 a estas dúas actuacións de mellora dos equipamentos deportivos de Bertamiráns. Estas obras están incluídas no POS+ 2019.
Na área deportiva de Bertamiráns vaise actuar principalmente na pista de tenis, que está ao carón do pavillón polideportivo, da piscina descuberta e do campo de fútbol. Deste xeito, vanse a tirar os muros existentes e mailas gradas desta pista de tenis que se pasará a ser un espazo aberto no que se construirá unha nova pista de pádel e unha nova pista polideportiva exterior. A pista de pádel disporá dun peche perimetral executado con piares de aceiro laminado de catro metros de altura e catro puntos/torres de iluminación, mentres que a pista polideportiva disporá dunha grada prefabricada e catro puntos de luz. Este proxecto foi adxudicado á empresa Galitec Desarrollos Tecnológicos SL por un importe de 89.353,66 euros.
Ademais, contémplase a construción de dous vestiarios, un para homes e outro para mulleres, no interior do pavillón municipal. O acceso realízase desde o vestíbulo que une o exterior do pavillón, zona da piscina coa pista interior, de forma que poidan acceder os usuarios da piscina, do anexo do pavillón e do propio pavillón. Os vestiarios teñen unha zona de bancos e ao fondo unha zona de duchas colectivas. Tamén se ten previsto acondicionar o espazo que actualmente se utiliza como almacén dos socorristas. Este proxecto foi adxudicado á empresa CYS HISPANIA SL por un importe de 54.949,61 euros.
Estes proxectos únese ao proxecto, xa executado, de ampliación do pavillón de Bertamiráns, que conta cun anexo dotado cunha nova sala de ximnasio e unha pista de squash cuberta. Neste proxecto investíronse 97.795. Ademais, debido a falta de espazos deportivos o goberno municipal ten previsto nos próximos anos ampliar o pavillón municipal cunha nova pista polideportiva cuberta. Para este proxecto estase buscando financiamento.
A concelleira de Deportes, Susana Señorís, explica que o Concello de Ames aposta polo fomento do deporte e engade “todas as melloras que se fagan nas instalacións deportivas existentes, así como os proxecto novos que se executen son moi necesarios, xa que hai unha alta demanda de instalacións por parte dos/as usuarios/as”.
Novas relacionadas:
Compostela 24 horas: "Adxudícanse as obras de rehabilitación e mellora da área deportiva e do pavillón de Bertamiráns"
Lindeiros: "Melloras na área deportiva de Bertamiráns en Ames"
