No Goberno municipal son conscientes da problemática existente na actualidade na hostalaría, un sector clave no concello que dá traballo a máis de 130 persoas e que move a xente doutros concellos na dinamización comercial.

A medida é unha extensión da que xa se tomara ao longo do confinamento para o ano 2020 coa derrogación da ordenanza fiscal que regulaba o cobro deste servizo e que foi acordada entre todos os grupos da Corporación municipal. A situación da hostalería, lonxe de recuperarse nesta nova etapa, acaba de sufrir un novo golpe coas restricións de mobilidade que están a causar grandes perdas e o peche de establecementos. Conscientes disto, desde o Concello de Ames quérese trasladar unha mensaxe de ánimo e con medidas precisas, aportar o gran de area para que o dano sexa o menor posible.

Desde o Concello recordan que suplementariamente a esta medida a Corporación municipal aprobou recentemente o Plan Reactiva Ames co obxectivo de axudar fiscalmente e con axudas directas ao sector empresarial, autónomos e comercios. O Plan conta cunha dotación de 7 millóns de euros, dos que máis de 1,5 millóns son para diversas axudas a alugueiros, gastos de servizo, e adquisición ou modernización dos establecementos. No último pleno, aprobouse unha moción presentada por Ames Novo á que o Goberno sumouse para solicitar axudas directas a este sector por parte da Xunta de Galicia.

A medida é complementaria á recentemente anunciada para o sector da venda ambulante e que se publicaba nestes días atrás. O Goberno municipal anunciaba a derrogación da ordenanza do mercado de rúa o que posibilitaba a exención do pago desta taxa para o ano 2021 e se sumaba á do ano 2020. Así, o Concello de Ames non cobrará nin pola taxa de instalación de postos no mercado de rúa, nin polas terrazas neste ano 2020 e en parte do 2021.

Ordenanza reguladora e ordenanza fiscal terrazas
Dende a Concellaría de Urbanismo informan que a nova ordenanza reguladora de terrazas si estará en vigor ao longo de 2021 logo do proceso de negociación levado a cabo nestes últimos meses. Esta ordenanza permitirá regular o uso das terrazas e acadar unha uniformidade no cumprimento das condicións. "O feito de que non se cobre pola taxa de ocupación non é escusa para que non se regule o servizo, e iso é o que queremos facer desde o Goberno municipal", afirma o alcalde e concelleiro de Urbanismo, Jose Miñones.

A ordenanza fiscal, que fora derrogada no pasado mes de abril, levarase a aprobación para o ano 2021, pero non entrará en vigor ata o segundo semestre do ano, e á espera da evolución da pandemia. O obxectivo do Goberno é poder facer a publicación de ambas ordenanzas na vindeira semana para un período aberto de consulta pública. Unha vez remate este prazo levaranse a aprobación plenaria e volveranse a someter a un período de alegacións para a súa aprobación definitiva. Preténdese ter para comezos de ano, estas ordenanzas en vigor e poder regular o servizo sen o cobro correspondente durante os primeiros seis meses de 2021.

A concelleira de Promoción Económica, Ana Belén Paz, sinala que "son moitos os esforzos que se están a facer para tratar de conseguir unha menor pegada da crise sanitaria no sector comercial e hostaleiro de Ames. Seguimos facendo un chamamento á cidadanía de Ames para que consuma no seu concello e axude directamente ao comercio local, recordando que <En Ames, témolo todo>".

Novas relacionadas:

La Voz de Galicia: "El Concello de Ames tampoco cobrará por las terrazas durante el primer semestre de 2021"

Compostela 24 horas: "Ames exime a la hostelería de tributar por las terrazas"

El Correo Gallego: "Os hostaleiros amesáns non pagarán polo uso de terrazas durante o primeiro semestre de 2021"

El Correo Gallego: "Ames non cobrará no 1º trimestre de 2021 o uso da vía como terraza"