A celebración comezou na praza do Concello coa lectura do Manifesto ao que lle puxeron voz o alcalde de Ames, Xosé Miñones, o concelleiro Quique Costas e as concelleiras Luísa Feijóo, Natividade González, Genma Otero e Oliva Agra. No documento, que este ano asinaron todos os membros da corporación municipal, lembrouse, entre outras cuestións, que ”este oito de marzo a ONU emprega a pandemia como claro exemplo do valor das mulleres no futuro da humanidade, pero tamén como evidencia da persistente discriminación e vulnerabilidade que sofren por mor do seu xénero”. Ao remate da lectura, a concelleira Luísa Feijóo convidou aos asistentes a achegarse á praza da Maía onde se ía presentar oficialmente o monólito dedicado á escritora amesá Filomena Fraga.

Foi o alcalde quen presentou a Filomena lembrando o carácter loitador e reivindicativo que a escritora de Agrón amosou desde moi nova: “Filomena non puido ir moito á escola e aos 14 anos foi servir ao Portanxil, aí xa se demostrou que era unha muller valente e con carácter, unha muller que foi capaz de reclamar un soldo igual ao dos homes porque ela facía o mesmo traballo que eles, e de deixar aquel traballo cando non llo concederon”. Fixo tamén alusión Miñones ao seu papel na loita a prol dunha educación mellor para os fillos e as fillas a través da  presidencia da ANPA do instituto de Negreira e o privilexio de formar co seu home un matrimonio adiantado aos seus tempos “onde todo se decidía de xeito consensuado”. Rematou a súa presentación o alcalde lembrando como aquela muller que sempre escribira chegou a publicar co apoio do Suso de Toro, profesor dos seus fillos e compañeiro de Filomena na loita pola mellora educativa dos anos setenta e oitenta, salientando que “os soños se se traballan, poden facerse realidade”.

Filomena dixo estar en débeda co concello de Ames que “sempre me valorou máis do que merecía” e lembrou que foi este concello o que lle reeditou “A Cancela”, despois de anos nos que non se podía atopar o libro. Recordou tamén a homenaxe que tamén noutro Día da Muller lle fixera o concello e a medalla de Ames que lle outorgaron o Día de Galicia de 2019. Tivo tamén palabras de agradecemento para os seus veciños e veciñas de Agrón e falando da parroquía, agromoulle a poeta que leva dentro: “alí foi onde nacín, alí onde me eu criei, alí coñecín amores, alí onde me casei”.

A escritora que adoita dicir dela mesma “eu so son unha labrega que escribiu un libro”, lembrou como as mulleres de aldea traballaban todo o día cos homes nas leiras e co gando, e cando chegaban á casa, mentres eles sentaban ou ían para a taberna, elas seguían a traballar, preparando a cea, coidando os sogros e os enfermos “eu tiven a sorte de non vivir así, pero vin moito diso e niso reflexionei tamén moito cando escribín A Cancela”.

A concelleira de Igualdade, Luisá Feijóo agradeceu a Filomena a súa presenza e todo o que nos leva ensinado ás mulleres: "Filomena é todo un referente que nos ensinou a loitar polo que creemos e hoxe está aquí presente tamén para lembrarnos que o 8M non é só un día, senón que o 8M ten que ser todos os días do ano”.

Acto da Plataforma Feminista de Ames

A conmemoración do Día da Muller no Concello rematou co acto da Plataforma Feminista de Ames. A praza da Maía lucía cordas violetas no chan. Preparounas a Plataforma para delimitar o espazo e manter así as distancias que impón a loita contra a pandemia. Moitos panos e moitas máscaras violetas. Pancartas da mesma cor nas que se lían as consignas que este ano, para evitar a propagación do virus a través dos aerosois, non se puideron berrar. “Urxe unha axencia pública de intermediación no emprego do fogar”, "Non son un can, non me asubies",  “Son o berro das que non teñen voz”, “Pandemia machista, vacina feminista”, eran algunhas das frases que se podían ler.

Léronse textos de mulleres que ao longo da historia deixaron a súa pegada como impulsoras da loita a prol dos dereitos da muller. Pilar Candocia, da Plataforma Feminista foi a encargada de presentar ás novas activistas e as creadoras dos textos que, ao longo da historia foron enfiando e apontoando o pensamento feminista. Verbas e pensamentos de Rosalía de Castro, Emilia Pardo Bazán, Concepción Arenal, Clara Campoamor e Nuria Varela soaron na praza da Maía nas voces da escritora, especialista en Rosalía, María López Sández, a enfermeira e activista Chiruca Tarrío, a decana de matemáticas e vicerectora Victoria Otero, a profesora e música Xulia Novais, e a estudante Elena Rodríguez.

Cun resumo do “Manifesto Galegas 8M”, que se leu onte en toda Galicia, rematou o acto. A encargada da lectura foi Diana Muñoz Leira da FPG. Ela foi a que deu paso á única consigna que se coreou en toda a tarde: “Viva a loita das mulleres”. Soaron máis aplausos que ecos das palabras.

Premendo nesta ligazón pódese ver a galería de imaxes completa.

Novas relacionadas:

El Correo Gallego: "Recoñecemento á loita feminina dende toda Área"