Primavera nas Fragas do Eume, este é o nome da actividade que organizou a Aula da Natureza do Concello de Ames para este sábado 24 de abril. Esta visita inclúese na programación que a Aula da Natureza propón a través do programa Pegadas.

Esta visita inclúe unha ruta polas Fragas do Eume e unha visita interpretada ao mosteiro de San Xoán de Caaveiro. As Fragas do Eume é un dos bosques atlánticos de ribeira mellor conservados de Europa. Dentro das súas 9.000 hectáreas de extensión viven menos de 500 persoas, o que dá unha idea do estado virxe destes exuberantes bosques que seguen o curso do río Eume. O parque ten a forma dun triángulo cuxos vértices e fronteiras serían As Pontes de García Rodríguez, Pontedeume e Monfero.

Por outra banda, visitarase o mosteiro de San Xoán de Caaveiro, que se atopa situado nun montículo rochoso entre os ríos Eume e Sesín, nas Fragas do Eume. As súas orixes remóntanse ó século X en que se teñen as primeiras noticias da existencia de vida monástica neste lugar. A historia de Caaveiro vencéllase a San Rosendo que pertenceu á orde de San Bieito e posteriormente foi mosteiro de cóengos regulares de San Agustín. Trátase dun conxunto de edificacións, algunhas xa desaparecidas: Igrexa principal, Igrexa de Santa Isabel, celdas, cabildo, sancristía, pozo, almacéns, arquivo, torre-campanario, etc.

Para esta actividade ofértanse 24 prazas. Para inscribirse hai que enviar un correo electrónico ao enderezo auladanatureza@concellodeames.gal. Terán prioridade as persoas anotadas na actividade que se ía realizar no pasado mes de novembro, que houbo que suspender polas medidas de restrición derivadas da Covid-19.

Haberá servizo de autobús dende Bertamiráns e O Milladoiro. A saída está prevista dende a praza do Concello, en Bertamiráns, ás 9.45 horas, e dende a Casa da Cultura do Milladoiro, ás 10.00 horas. O regreso está previsto para ás 18.00 horas ao Milladoiro e ás 18.15 horas a Bertamiráns. Cada participante deberá levar a súa propia comida. O xantar farase nunha área recreativa.