Está previsto que este domingo, 12 de decembro, a partir das 12:00 horas, se dispute a XIV edición da carreira ciclista do pavo. As persoas participantes terán que dar unhas vinte voltas ao circuíto, duns 1.600 metros de lonxitude, se así as condicións meteorolóxicas o permiten. No inicio das voltas 5, 10 e 15, realizarase un sprint especial ao paso por meta, para repartir premios de Nadal entre os/as gañadores/as.

Debido á celebración desta proba, en horario de 11:45 a 13:00 horas, cortarase o tráfico en Bertamiráns, nun tramo da avenida da Maía (dende a rotonda principal ata a estrada de Lapido), na estrada de Lapido, no camiño de Paraxó e na rúa das Pesqueiras, para que circulen os/as ciclistas durante o transcurso da proba. Recoméndase evitar as vías mencionadas, na medida do posible, e utilizar a AG-56 e desvíos alternativos, así como ter en conta o uso dos garaxes afectados polas vías mencionadas durante dito horario. Premendo nesta ligazón podes descargar un aviso sobre os cortes de tráfico en Bertamiráns debido á celebración da carreira ciclista do pavo.

As actividades para a cativada terán lugar antes do arranque da carreira, ás 11:00 horas, cunhas xincanas ciclistas. A organización recorda que as nenas e nenos tamén deben inscribirse seguindo os mesmos pasos que as persoas que queiran participar na carreira sen licenza, para así contar con seguro durante a actividade.

Homenaxe ao ciclista Gustavo César Veloso
Ao remate da proba, a comunidade do ciclismo galego que se achegue á proba participará nunha homenaxe ao ciclista Gustavo César Veloso, que aos 41 anos pecha a súa carreira como profesional da bicicleta. Do seu palmarés, destacan dúas vitorias na clasificación xeral da Volta a Portugal (2014, 2015), unha da Volta a Cataluña (2008) e unha vitoria de etapa na Volta a España en 2009, co xa desaparecido Xacobeo Galicia.

Os premios da carreira, como é habitual, consisten na entrega dun pavo, un polo e unha perdiz para o primeiro, segundo e terceiro clasificado, respectivamente. Cómpre sinalar que non se trata de animais vivos, e que estes obsequios se entregan ás primeiras persoas en cruzar a meta, ao só haber unha categoría de competición.

As persoas que xa estean federadas xa poden inscribirse na proba a través da web da Federación Galega de Ciclismo, ou ben esperar ata a xornada de celebración da carreira, ás 11:00 horas, cando poderán facer a súa inscrición de maneira presencial. No caso de non estar federado, cómpre enviar datos persoais ao enderezo electrónico begoalonso@mundo-r.com, antes do 10 de decembro ás 14:00 horas.

De acordo coa normativa da Xunta de Galicia, esíxese o certificado de vacinación con pauta completa ou un test de antíxenos para a participación na proba. Este test debe realizarse cunha antelación máxima á celebración da proba de 72 horas.

Novas relacionadas

El Correo Gallego: "A Carreira do Pavo incluirá o domingo cortes na capital maiá"