As bibliotecas de Ames celebran unha nova edición dos seus encontros literarios do curso 2022-2023 este xoves 17 de novembro. A escritora Marga Tojo presentará "Arder", un poemario editado por Edicións Positivas. A entrada é libre ata completar aforo.

O departamento de Bibliotecas de Ames organiza deste xeito o sexto encontro literario do curso 2022-2023, unha das principais actividades programadas para adultos. Dende setembro xa interviñeran os autores Diego Rojo, Eduardo Estévez, Xosé Manoel Núñez Seixas, Fernando Franjo e Alfredo Conde.

A obra protagonista nesta ocasión é "Arder" o último poemario de Marga Tojo, que está editado por Edicións Positivas. A concelleira de Cultura, Natividade González, será a encargada de facer a presentación. Ademais, a autora estará acompañada da xornalista, Elena Martín, de Xarda Cooperativa Galega de Comunicación.

Arder é un texto con compromiso político. En Arder hai unha historia de amor nun escenario húmido e arriscado. Arder é habitar o corpo. En Arder ningunha utopía de autorregulación do capital controla as posibilidades de quererse. O encontro será unha conversa entre a xornalista e escritora Marga Tojo e a xornalista Elena Martín. Entre as dúas debullarán a obra "Arder: poética do que acontece na cidade".

A autora: Marga Tojo
Marga Tojo González conta con catro obras publicadas: Últimos bruídos (2016); Cara de velocidade (2018); Maternidade fóra de catálogo (2018) e Arder (2021). Ademais, Marga Tojo é colaboradora dos medios dixitais Praza Pública, Eldiario ou o diario Público, así como da Revista Luzes, da Revista do Audiovisual Galego ou da canle de televisión Galizaanocero.