A proba pertence ao IX Circuíto provincial de carreiras populares da Deputación da Coruña. Contará cun circuíto urbano de 10 quilómetros, que está homologado pola Real Federación Española de Atletismo, con saída e chegada en Bertamiráns, na rúa Alcalde Lorenzo, nas inmediacións da Casa do Concello. O percorrido estará debidamente sinalizado e haberá indicacións en cada quilómetro. Este ano debido ás obras que se están realizando nas rúas Ameneiral e Entrerríos, as probas das categorías escolares realizaranse na zona do paseo fluvial. Na súa organización desta proba colaboran os clubs de atletismo de Ames: club de atletismo Sar, club de atletismo MillaRaio, e club Ames Atletismo.

Os participantes poden retirar os seus dorsais na secretaría da organización, situada na Casa do Concello (praza do Concello número 2, Bertamiráns) o día anterior á carreira (o sábado 21 de outubro), das 17:00 ás 20:00 horas, ou na mesma xornada, o domingo 22, ata media hora antes do inicio da proba correspondente. Para non gardar cola recoméndase acudir ao Concello o día anterior no horario establecido. Premendo nesta ligazón podes decargar o mapa de servizos da carreira.

Participantes e premios
Este ano anotáronse un total de 1.151 participantes. Deles, 640 pertencen ás categorías escolares femininas e masculinas (pitufos, prebenxamín, sub10, sub 12, sub14 e sub16), mentres que entre os corredores da categoría absoluta e sub18 suman 511 persoas.

Serán galardoados cun trofeo os tres primeiros clasificados de cada categoría, masculina e feminina. Haberá tamén catro premios en metálico: 250 euros para o gañador, 200 para o subcampión, 100 para o terceiro clasificado e 50 para o cuarto. Na proba absoluta, ademais, tamén recibirán un trofeo os tres primeiros corredores locais empadroados no concello de Ames que cheguen á meta. Pola súa banda, os máis pequenos serán premiados cunha medalla.

Como vén sendo habitual durante as últimas edicións, tamén se entregará un trofeo aos tres primeiros clubs da carreira absoluta, e premios en metálico aos catro primeiros (250 euros para o gañador, 175 para o segundo clasificado, 100 para o terceiro e 75 para o cuarto).

Horarios e distancias
A saída e a chegada da proba absoluta e sub 18 farase dende a rúa Alcalde Lorenzo, situada no núcleo central de Bertamiráns, de maneira que poida ser partícipe toda a veciñanza de Ames. Os corredores da categoría absoluta comezarán ás 10:30 horas, e deberán dar dúas voltas ao circuíto, completando un total de dez quilómetros. Pola súa banda, os participantes da proba sub18 darán unha única volta, facendo un recorrido de 5,25 quilómetros.

Posteriormente, ás 12:00 horas, está previsto que comecen as probas das categorías escolares. Este ano debido ás obras que se están realizando nas rúas Ameneiral e Entrerríos, as probas das categorías escolares realizaranse na zona do paseo fluvial. Ás 12.00 horas correran os nenos e nenas da categoría pitufo, integrada por crianzas nadas no ano 2019 e posteriores, que correrán 200 metros. Xa a partir das 12:10 horas comezarán a carreira os prebenxamíns, nados no 2016, 2017 e 2018, que recorrerán 350 metros.

Entre as 12:30 e as 12:40 competirán os rapaces e rapazas das probas sub10, que farán 1.300 metros. Ás 12.50 será a quenda dos sub 12, que tamén correrán 1.300 metros, e ás 13:00 correrán os rapaces e rapazas das categorías sub14 e sub16, que correrán 1.900 metros.

Cortes e prohibicións de tráfico
O día do evento, domingo 22 de outubro, quedará prohibido estacionar na rúa Alcalde Lorenzo desde as 00:00 horas ata as 15:00 horas. Ademais, haberá cortes de tráfico en diversas rúas e aldeas polas que transcorre a carreira de 08:00 horas a 15:00 horas. Os lugares afectados son a rúa Alcalde Lorenzo, A Condomiña (estrada DP-0205 ata rotonda do Agro do Muíño), Agro do Muíño, Sisalde, rúa Entrerríos, rúa Agrelo, rúa Xunqueira, A Condomiña e As Punxeiras. Recoméndase evitar esas vías e acceder a través da AG-46 ou a AC-300 (Os Ánxeles-Picaraña) cara a Padrón. Preme nesta ligazón para descargar dito aviso.