En virtude deste acordo, o Concello de Ames comprométese a ceder á Xunta de Galicia dúas parcelas contiguas na zona de Bouzas, ambas de 997 metros cadrados, actualmente empregadas como punto de encontro das brigadas contra incendios.

Pola súa banda, o Goberno galego porá a disposición do Concello de Ames tres inmobles de titularidade autonómica procedente das antigas cámaras agrarias locais: unha parcela de 8.947 metros cadrados, na zona de Ventín, antigamente empregada como campo de fútbol do Biduído; un edificio no lugar de Augapesada; e un local comercial na rúa Alcalde Lorenzo, un entre-solo utilizado como Xulgado de Paz.

Campo para a práctica do atletismo
A parcela do antigo campo de fútbol do Biduído será adaptada como campo de lanzamento homologado para a práctica do atletismo por un importe de preto de 250.000 euros. O expediente de licitación foi aprobado en Xunta de Goberno Local o pasado 17 de agosto. As parcelas afectadas xa están sendo utilizadas na actualidade polos club de atletismo do concello para a práctica de varias disciplinas deportivas de atletismo.

O proxecto recolle a construción dun corredor de lanzamento de xavelina e dun círculo de lanzamento de peso, cos seus correspondentes sectores de caída. O corredor de lanzamento de xavelina executarase de xeito paralelo á xaula de lanzamento de disco/martelo existente, de forma que os sectores de caída dunha e outra disciplina poidan ser compartidos. Dito corredor estará composto por un corredor de lanzamento, arco límite e sector de caída da xavelina.

O círculo de lanzamento de peso disporá dun sector de caída do artefacto con pavimento de arena e sub-base drenante, delimitando dito sector con borde de formigón prefabricado. Ademais, executaranse gabias drenantes en forma de espiña de pez que garantan unha drenaxe eficaz do terreo de xogo.

Mellora dos accesos e vestiarios
No proxecto tamén está contemplada unha mellora dos accesos e dos vestiarios da instalación, así como a colocación dun novo portal metálico de porta corredoira. O pavimento dos accesos executarase con formigón e tamén se executarán traballos de mantemento no porche exterior existente e nun dos locais de almacenaxe de material deportivo.

O rexedor amesán destaca que “este é o claro exemplo de como a cidadanía se pode beneficiar dos acordos entre as distintas administracións. A Xunta está a tempo de rectificar a súa decisión de recorrer o proxecto da travesía do Milladoiro e sentarse a falar para chegar a acordos como acabamos de asinar”.

Novas relacionadas:

El Correo Gallego: "La Xunta cede a Ames el viejo campo del Biduído para reconvertirlo en un complejo deportivo"