O curso de monitores de tempo libre comezou o pasado 13 de xaneiro, coa participación de 15 mozos e mozas, na súa maioría de Ames, de entre 18 e 21 anos. A formación, de 350 horas en total, incluíu contidos específicos de medio ambiente e educación ambiental, primeiros auxilios básicos, atención a colectivos desfavorecidos ou persoas con diversidade funcional e coñecementos de manipulación de alimentos. Así mesmo, nel tamén se abordaron outras disciplinas como a animación deportiva, o xogo ou a psicoloxía. Fíxose tamén especial fincapé na igualdade e a prevención de riscos laborais, así como na importancia do uso do galego nas actividades de tempo libre.

As 350 horas de duración divídense en dous bloques: un primeiro teórico-práctico de 200 horas e un segundo integramente práctico de 150. A pasada fin de semana, os rapaces e rapazas que están participando este ano no curso de monitor de tempo libre remataron as 200 horas teórico-prácticas.

A concelleira de Mocidade, Carmen Porto, felicitou aos mozos e mozas que conseguiron superar esta fase teórica do curso pois “conseguir o certificado de monitor/a de tempo libre supón abrir moitas moitas portas para unha primeira experiencia laboral”. Porto finalizou animando á mocidade a demandar máis cursos e facer propostas pois “sodes o futuro e tedes as portas do Concello abertas para todo o que precisedes”.

150 horas de prácticas
O segundo bloque do curso está conformado por 150 horas de prácticas en actividades de tempo libre supervisadas por un titor ou titora. Este segundo bloque conta con dúas modalidades de realización: 14 días de participación nunha actividade ao aire libre, que se poderán agrupar en bloques non inferiores a tres días, ou 150 horas en actividades cunha entidade que traballe no eido da educación no tempo libre. O alumnado dispón dun prazo de dous anos para facer as prácticas, e maioría está interesado en realizalas nos campamentos municipais ou nos servizos complementarios do departamento de Educación.