Este venres, 3 de maio, o auditorio da Casa da Cultura do Milladoiro acolle a obra "As r(h)umorosas" ás 20:30 horas. Este é o derradeiro dos 12 espectáculos que integran a programación de artes escénicas “Ames Cultural 2024”. Así, o Concello de Ames propón para este venres unha comedia dirixida a público adulto.

Sinopse de "As r(h)umorosas"
Despois de anos preguntándonos “Que din os rumorosos?”, as actrices Carmen Méndez, Marta Doviro e Ledicia Sola pregúntanse agora “Que din as rumorosas?”.

“Só unha de cada dez rúas ten nome de muller”. A partir desta noticia real, esta comedia teatral recolle a procura de mulleres ilustres galegas para actualizar o noso rueiro. Nela, as candidatas a ter unha rúa co seu nome teñen que demostrar a súa valía durante un peculiar proceso de selección.

Nesta obra, o público coñecerá, entre rumor e humor, máis detalles das vidas destas mulleres galegas dun xeito diferente e divertido. As r(h)umorosas falan, cantan e bailan para dar  vida a estas mulleres e serán tamén xuíz e parte nesta escolla.

Programación de artes escénicas do primeiro semestre de 2024
A programación “Ames Cultural 2024”, que comezou o pasado 1 de marzo, estivo conformada por un total de doce representacións, das que dez foron de teatro e dúas de danza, e que se distribuíron de maneira equitativa entre os auditorios de Bertamiráns e do Milladoiro. As propostas abarcaron actuacións tanto para adultos como para público familiar. Ademais, incluíuse unha ampla oferta de xéneros, teatro de comedia, contemporáneo e drama, así como danza tradicional e contemporánea.

O orzamento total investido ascende a 48.909 euros, dos cales 22.213,50 euros foron aportados polo Concello de Ames, e os 26.695,50 euros restantes, pola Axencia Galega de Industrias Culturais (AGADIC). Esta programación forma parte do convenio de colaboración entre a Axencia Galega das industrias Culturais (AGADIC) e o Concello de Ames.

Novas relacionadas:

El Correo Gallego: "La obra ‘As r(h)umorosas´ logró agotar las entradas en Milladoiro"