O club de tenis Val da Maía, en colaboración co departamento de Deportes do Concello de Ames, organiza o II Aberto de San Xoán, que se celebrará do 22 ao 30 de xuño nas pistas de tenis de Aldea Nova. As categorías para participar son alevín, infantil, junior, absoluto e veteranos+35. Todas elas contarán con categoría feminina e masculina.

Categorías
As persoas inscritas poderán participar nun máximo de dúas categorías. Se algunha non acadase o mínimo de seis participantes, a organización reservase o dereito de cancelar dita proba.

Así mesmo, establécese un máximo de participantes por categoría:

• Alevín femenino, infantil femenino e junior femenino: 8 participantes.
• Alevín masculino, infantil masculino e junior masculino: 12 participantes.
• Absoluto masculino e feminino, e veteranos+35 masculino e feminino: 16 participantes.

En caso de que os inscritos superen o máximo de participantes establecido, a orde de prioridade decidirase en función da clasificación nacional vixente. Aqueles/as inscritos/as que por prioridade de ranking non sexan incluídos na lista de admitidos ao torneo, serán reembolsados do importe da inscrición.

Inscrición
A inscrición estará aberta ata o 17 de xuño ás 22:00 horas, e poderá formalizarse a través desta ligazón. A cota de inscrición é de 17 euros, e deberá aboarse antes do peche da inscrición a través da plataforma de ibertenis.

Os/as xogadores/as con licenza polo club organizador terán un desconto de 3 euros na cota de inscrición e poderán formalizar o pago directamente nas súas instalacións.