A Aula Municipal Tecnolóxica da Información e da Comunicación organizou para este mes de decembro unha programación específica de Nadal, que inclúe un curso para persoas adultas e tres cursos para rapaces e rapazas.

Dita programación comeza cun obradoiro para adultos sobre compras seguras a través da internet, que se impartirá os días 11, 12 e 18 de decembro, en horario de mañá, de 10.00 a 12.00 horas, na aula AMTIC da Casa da Cultura do Milladoiro.

O obxectivo principal deste curso é que as persoas participantes aprendan todas as bases para realizar unha boa compra a través da rede. Coa chegada do Nadal, é frecuente que aumenten as estafas na Internet, polo que é imprescindible saber identificar posibles enganos e tamén coñecer o proceso completo dunha boa compra: busca da mellor oferta, métodos de pago, proceso post-venta, dereitos coma consumidor e posible devolución do produto.

Cursos para rapaces
Os máis pequenos da casa tamén contarán con actividades orientados á súa formación na rede a través do curso de postais de Nadal Paint, dirixido á rapaza de entre 5 e 8 anos. Impartirase do 23 ao 30 de decembro, en horario de 10.30 horas a 12.00 horas, tamén na aula AMTIC da Casa da Cultura do Milladoiro. Centrado nos máis pequenos, o obxectivo é que vaian coñecendo pouco a pouco o mundo da informática creando postais de Nadal co programa Paint.

Na mesma liña, impartiranse o resto de cursos orientados á cativada. Do 26 ao 2 de xaneiro, realizarase o curso de postais de Nadal Scratch, dirixido aos nenos e nenas de entre 8 e 14 anos. A formación será en horario de mañá, de 10.00 horas ás 12.00 horas na aula AMTIC da Casa da Cultura do Milladoiro. Co uso deste programa, a rapazada coñecerá coñecementos básicos de programación, a través da realización de ilustracións de Nadal co programa scratch.

O terceiro curso que se realizará será de postais de Nadal Pixelart, dirixido aos mozos e mozas de 9 a 12 anos e que se realizará de 10.00 horas a 12.00 horas, entre os días 27 de decembro ao 3 de xaneiro na Aula AMTIC da Casa da Cultura do Milladoiro. Nel aprenderán a facer debuxos de Nadal con programas pixelart (debuxos de baixa resolución semellantes aos dos videoxogos clásicos).

Como participar?
A inscrición en calquera destes cursos pode realizarse chamando ao número de teléfono 674 59 48 43, enviando ao enderezo informatica.milladoiro@gmail.com a ficha de solicitude de inscrición cuberta e asinada, ou de xeito presencial na aula AMTIC do Milladoiro en horario de aula aberta (de luns a venres de 10.00 a 12.30 horas e de 16.00 a 20.00 horas).