O vindeiro martes, 25 de marzo, ás 20.30 horas, o auditorio da Casa da Cultura do Milladoiro acollerá a representación da nova obra da compañía Berrobambán, “Ubasute”, unha peza que invita ao espectador a reflexionar sobre o abandono e a etapa da vellez. As persoas interesadas en asistir á obra xa poden descargar os seus convites, de xeito gratuíto, na Billeteira electrónica.

Residencias artísticas
Esta proposta artística é unha actividade de mediación que realiza a compañía Berrobambán por estar a realizar unha residencia artística en Ames. As residencias artísticas son unha iniciativa que oferta a Concellaría de Cultura ás compañías profesionais, creadores e creadoras do ámbito das artes escénicas para que poidan desenvolver os seus respectivos proxectos.

Deste xeito, o Concello de Ames pretende apoiar á creación artística do tecido profesional e empresarial, ofrecéndolles aos artistas os espazos e equipamento necesarios para o ensaio e produción dos seus diferentes proxectos escénicos. A cambio, as compañías deberán propoñer unha serie de actividades pedagóxicas orientadas á comunidade educativa, de promoción do teatro, orientadas á creación de novo público e á estrea das novas producións.

Na mesma liña, ademais deste espectáculo que terá lugar o 25 de marzo, a compañía Berrobamban realizará un pase desta nova produción o vindeiro mércores, día 26, dirixido ao alumnado de 2º de Bacharelato de Artes Escénicas do IES do Milladoiro.

Sinopse de “Ubasute”
Ubasute é un dos proxectos máis recentes de Paula Carballeira, actriz, directora e escritora cunha longa traxectoria ás súas costas. Nesta peza, trátanse temas profundos como o abandono ou a vellez, invitando á reflexión sobre os mesmos.

Así mesmo, Ubasute é un termo xaponés que significa “abandono dunha anciá” e que se refire ao presunto costume de deixar nunha montaña ou nun lugar afastado a un parente vello ou enfermo. Esta peza, a pesar de semellar simple, é difícil de clasificar, pois conxuga xéneros e abre diferentes enigmas para colocar  finalmente o foco de atención na reflexión ao redor do abandono.

Dunha forma moi sutil e lúdica, a autora, Paula Carballeira, toca temas de profunda gravidade a través dun xoguete escénico livián que brinda a posibilidade de emprender múltiples viaxes: a de acompañar o tránsito de cada personaxe e a de emprender unha viaxe interior na que cada espectadora poida recoñecerse mentres se abandona ao que queda implícito entre liñas.

Sobre Berrobambán
A compañía Berrobambán conta con máis de dúas décadas de experiencia sobre os escenarios de todo o mundo, creando e representando obras dirixidas para todo tipo de público. Ademais de apostar por un teatro que fomente valores como a igualdade ou o compromiso, o grupo leva dende hai uns anos desenvolvendo unha serie de proxectos dentro do eido social e educativo.

Por outra banda, o vindeiro 16 de maio, Berrobambán representará no auditorio de Bertamiráns a obra “Mulleres que viven soas #MQVS”, a última das pezas incluídas na programación do Ames Cultural para o primeiro semestre do ano. Nesta representación, mestúranse as modalidades do teatro documental, a comedia e o teatro isabelino a través da historia de tres bruxas que plasman á perfección as diferenzas de como nos percibe o resto da xente a como nos sentimos nós mesmas dentro das nosas casas.

Novas relacionadas:

Lindeiros: "Berrobambán representa no Milladoiro "Ubasute""