[22-01-2011] O Concello de Ames está levando a cabo diversas accións co obxectivo de fomentar o emprego local entre a veciñanza amiense. Existen varias ferramentas que a Administración local leva desenvolvendo no eido da formación e que están dirixidas ás persoas desempregadas para que poidan optar a traballos en sectores dun maior índice de ocupacionalidade. Rematado o 2010 toca facer balance e avaliar as políticas activas de emprego postas en marcha durante o pasado ano. Un total de 327 persoas participaron nas diferentes accións de formación e de fomento do emprego, así como nos programas formativos desenvolvidos durante o 2010. A través dos programas de cooperación contratáronse 33 persoas que integraron diferentes brigadas e que traballaron en varios programas municipais. Na actualidade estase desenvolvendo a cuarta edición do programa InserAmes do que se están beneficiando 100 usuarios/as. Durante o ano pasado Ames dedicou 1.379.798,90 euros (procedentes dos fondos propios e de diferentes axudas doutras administracións) ás políticas activas de emprego.

[21-01-2011] A aula de informática do Milladoiro acolle desde esta semana un curso de iniciación a internet para os membros do Club de Pensionistas e Xubilados do Milladoiro (JUPEMI). Este obradoiro desenvolverase ata o 16 de marzo, todos os mércores entre as 16:30 h. e as 17:30 horas. As nove persoas que están inscritas ata o de agora terán a oportunidade de familiarizarse co manexo desta útil ferramenta, aprendendo a usar internet para toda unha serie de actividades da súa vida diaria.

[21-01-2011] O 31 de xaneiro rematan os traballos que está realizando a brigada de patrimonio. Este grupo de traballo estase encargando de acondicionar e mellorar o contorno de diversas instalacións e espazos patrimoniais do concello. A devandita brigada púxose ao servizo do Concello a través do Plan de Cooperación 2010 "Adaptabilidade e Emprego" da Xunta de Galicia, por un período de seis meses que se iniciou o pasado verán -o 1 agosto- e remata o 31 deste mes de xaneiro. A finalidade desta actuación é eliminar o "feísmo" dos espazos habitados do concello, promover a conservación dos elementos patrimoniais para que se manteñan en bo estado ao longo do tempo e eliminar o risco de accidente para os cidadáns que visitan este tipo de espazos.

[20-01-2011] Todos aqueles nenos e nenas que o desexen aínda teñen a posibilidade de inscribirse no obradoiro de paz que se desenvolverá o mércores 26 e o xoves 27 nas bibliotecas municipais de Bertamiráns e do Milladoiro. O prazo de inscrición estará aberto ata o día 22 de xaneiro. Durante o mes de xaneiro a Biblioteca Municipal de Ames fai xirar a súa programación arredor dun concepto tan importante como a paz, un valor para as xeracións máis novas que poderán aprender sobre esta ao longo destes días. Ademais haberá novas sesións de contacontos ao longo de toda esta semana. O lema da campaña é "Xaneiro: só tres letras, PAZ".