[20-01-2011] O Fondo Galego de Cooperación e Solidariedade, do que é membro o Concello de Ames, vén de por en marcha unha campaña de incidencia política para lograr que se manteña o compromiso cos países empobrecidos. Trátase, perante os próximos comicios municipais, de que as forzas políticas teñan presente que a sociedade galega si lles demanda que manteñan o pulso da solidariedade coas persoas e países que viven en crise estrutural e, pola mesma, permanente. Estase a falar dun esforzo ínfimo que debera ser aumentado. Picando na ligazón que hai ao pé deste anuncio poderás consultar o comunicado enviado polo Fondo Galego.

[19-01-2011] O alcalde de Ames, Carlos Fernández, e a directora xeral da Fundación Meniños, Mónica Permuy López, asinaron a renovación do convenio de colaboración que ten subscrito o Concello con este organismo para desenvolver o programa "Responsable Solidaria" nos centros educativos do Concello. A este acto tamén asistiron as coordinadoras do departamento de Educación, Emilia Seara e Sanda Dios. Para a continuación do proxecto da fundación Meniños en Ames, a Administración local achegará 2.500 euros e o apoio do departamento de Educación e Servizos Complementarios. "Responsable Solidaria" contempla dúas actuacións: a proposta para educación infantil "Facendo Familias" e o portal web "O mundo de Milu".

[18-01-2011] "Celda 211", "Avatar" e "O Equipo A" son as películas que se proxectarán no segundo ciclo de Cine Xove que organiza a concellaría de Mocidade co fin de ofrecer alternativas de ocio para os máis xoves. As proxeccións comezarán no auditorio da Casa da Cultura de Bertamiráns o venres, 21 de xaneiro, ás oito da tarde. Está convidada toda a mocidade de Ames.

[17-01-2011] Onte pola tarde tivo lugar o acto de inauguración do novo local social do Club de Jubilados y Pensionista del Milladoiro (JUPEMI). A este acto asistiron o alcalde de Ames, Carlos Fernández, a concelleira de Benestar Social e Igualdade, Isabel González, e o presidente da devandita asociación, Manuel Montero. O novo local ten un emprazamento moi céntrico, xa que está situado na rúa Figueiras, e conta cunha superficie aproximada de 200 metros cadrados. O cambio de local realizouse despois de que no Pleno do mes de decembro se aprobase un convenio de colaboración entre o Concello de Ames e o Club de Jubilados e Pensionistas de O Milladoiro (JUPEMI) mediante o cal a Administración local comprométese a aboar a cantidade de 1.200 euros mensuais para sufragar o aluguer deste local. A través deste convenio o Concello poderá empregar este local para desenvolver diferentes actividades municipais. As fotos que podemos ver con esta nova foron cedidas por un dos integrantes deste club, Ramón Álvarez.