O vindeiro 8 de novembro, ás 19:00 horas, o grupo  de teatro LaGriot´te impartirá na Casa da Cultura de Bertamiráns un obradoiro de teatro físico, no que indagar sobre o poder da imaxinación e a capacidade do corpo para contar e amosar historias. Para participar nesta actividade, dirixida a maiores de 16 anos, só hai que enviar un correo a cultura@concellodeames.gal indicando nome, apelidos, idade e un teléfono. Ofértanse un máximo de 20 prazas que se adxudicarán por orde de inscrición.

O pasado 1 de outubro deu comezo un novo curso das Escolas deportivas municipais, nas que preto de 1.700 veciños e veciñas de Ames participan en 18 actividades, que se enmarcan nos programas de Formación deportiva e Ponte en forma. Este curso as actividades que teñen maior participación son pilates con 340 participantes, patinaxe con 202 e aerozumba con 158. Na actualidade, hai 1.670 usuarios/as inscritos, pero dende o departamento de Deportes agardan que esta cifra se incremente ata polo menos os 1.700 participantes, porque aínda se están tramitando inscricións nas prazas que quedaron libres. Deste xeito, a Concellaría de Deportes mantén aberto o prazo para anotarse nas prazas libres das Escolas deportivas municipais 2024/2025. As persoas interesadas poden xestionar a matrícula de xeito telemático a través da plataforma Cronos, no módulo “inscrición en clases”.

O alcalde de Ames, Blas García, asistiu esta mañá á xuntanza de alcaldes e alcaldesas dos Concellos implicados na comarcalización do servizo de bombeiros. Dita xuntanza foi convocada pola alcaldesa de Santiago de Compostela, para explicar os avances neste proxecto. O concelleiro de Mobilidade e Convivencia de Santiago de Compostela, Xan Duro, presentou na reunión o anteproxecto do edificio do novo parque, que se vai situar na avenida do Cruceiro da Coruña e non en Salgueiriños como estaba previsto. Todos os Concellos mostraron o seu apoio a esta localización "que garante unha mellor operatividade para os demais municipios implicados".

O Concello de Ames pon en marcha por sétimo ano consecutivo os Premios Lingua e Empresa, co obxectivo de recoñecer o uso e fomento da lingua galega na actividade empresarial. Optarán a este galardón todas as empresas, con sede social ou centro de actividade no concello de Ames, que sexan propostas ata o 21 de novembro por calquera persoa ou entidade, ou pola propia empresa que queira participar. A dotación económica do premio é de 3.000 euros, que serán repartidos entre dúas categorías. Este ano, como novidade, a concellería de Promoción Económica volve unirse ao Servizo de Normalización Lingüística na organización destes premios. Arredor de 70 empresas presentáronse a este certame nas seis edicións anteriores. As bases do concurso e a ficha de inscrición pódense descargar premendo nesta ligazón.