“Altamira Brilla”, a festa histórica do val da Maía, que organizan os Concellos de Ames e Brión, xunto coa Deputación da Coruña, para conmemorar a histórica Batalla de Altamira, chega esta semana á súa segunda edición. Serán dúas xornadas de actividades, os días 10 e 11 de xuño, nun amplo programa que inclúe a presentación no Pazo da Peregrina, en Bertamiráns, do proxecto e posta en valor das Torres de Altamira, tamén dos traballos de investigación que se están levando a cabo para a elaboración do plan director das Torres, unha ruta histórica, a representación teatral a cargo do grupo Os Quinquilláns e os concertos de Caldo e de Grande Amore.

A Xuntanza de Empresarios de Ames, en colaboración co Concello de Ames, organiza a terceira edición do concurso de fotografía Enfoca Ames. O obxectivo deste certame é fomentar o achegamento da cidadanía aos lugares máis emblemáticos do concello de Ames. As persoas participantes deberán presentar unha fotografía que recolla o patrimonio natural, artístico e/ou cultural do concello de Ames. Admítese unha fotografía por cada unha das tres categorías existentes. A participación no concurso é gratuíta. O prazo de entrega das imaxes vai do 25 de maio ao 11 de xuño de 2023. As fotografías teñen que ser enviadas xunto coa ficha de inscrición por correo electrónico ao enderezo enfocames@gmail.com. 

O Concello de Ames, a través dos departamentos de Normalización Lingüística e Turismo, organizou para este domingo 27 de abril unha andaina polo Mar de Ovellas. Esta actividade, que está incluída na programación de Rosalía 2025, tivo que ser adiada en dúas ocasións por inclemencias meteorolóxicas. As persoas que queiran participar na andaina teñen que escribir un correo electrónico ao enderezo normalizacion@concellodeames.gal. Trátase dunha ruta de dificultade media que parte de Augapesada e vai ata o local social de Trasmonte. O seu itinerario coincide co Camiño de Fisterra – Muxía. A andaina estará teatralizada polos Quinquilláns e Lupe Blanco. A actividade rematará no local social de Trasmonte cunha pequena festa con música e degustación de petiscos.

Teresa Villaverde, alcaldesa de Lousame, e Manuel Lens, Concelleiro de Turismo de Ames, Presidenta e Secretario da Asociación de Concellos do Camiño da Ría de Muros Noia, respectivamente, xunto con Inés Monteagudo, alcaldesa de Muros; Luís Oujo, alcalde de Porto do Son; Santiago Freire, alcalde de Noia; Manuel Dos Santos, Concelleiro de Turismo de Rois, e Pablo Lago, alcalde de Brión, foron recibidos  por  José  Miñones na tarde do pasado luns nas instalacións  da  Delegación do Goberno, na cidade da Coruña, para abordar distintos aspectos relativos ao Camiño da Ría de Muros Noia que son competencia de varios organismos de ámbito estatal.