Co obxectivo de promocionar a actividade física e facilitar a redución do sedentarismo entre os e as amesás de todas as idades, o Concello de Ames organiza un ano máis o programa de andainas saudables. Nesta ocasión o programa leva como título SaudeAndo, e conta coa colaboración dos centros de saúde do Milladoiro e Bertamiráns.

Ao abeiro deste programa, este xoves ten lugar unha nova andaina, que nesta ocasión se realiza na localidade de Bertamiráns. Ao igual que as trinta andainas programadas ao abeiro desta iniciativa, será unha ruta urbana de dificultade media - baixa de trazado circular e unha duración aproximada dunha hora ou hora e media. Asemade, partirá ás 17:30 horas dende o centro médico do núcleo urbano, punto no que rematará a andaina ao final do percorrido.

Ao igual que en andainas anteriores, a actividade estará supervisada por Ricardo Angueira Vázquez, o monitor que impartiu o curso de iniciación de Marcha Nórdica, polo que a andaina tamén servirá para seguir afianzando o aprendido nos obradoiros ou comezar a aplicar algúns trucos desta modalidade neste tipo de actividades. Para participar nesta actividade non é preciso inscribirse previamente, posto que está aberta a toda a veciñanza.

Calendario de andainas durante o 2019
Entre os meses de marzo e decembro deste 2019 realizaranse un total de 30 andainas, das que 16 terán lugar en Bertamiráns e 14 no Milladoiro. As próximas andainas que se realizarán en Bertamiráns son os días 6 e 20 de xuño, 5 e 19 de setembro, 3, 17 e 31 de outubro, 14 e 28 de novembro, e 12 de decembro. As andainas que quedan por facer no Milladoiro realizaranse os días 13 e 27 de xuño, 12 e 26 de setembro, 10 e 24 de outubro, 7 e 21 de novembro, e 5 e 19 de decembro.